Partia Demokratike dhe Lëvizja Socialiste për Integrim kanë braktisur dje punimet e seancës plenare. Me pretendimin se ligji për teatrin është manipuluar, opozita u largua sërish nga salla e Kuvendit duke mos u bërë pjesë e votimit, ku ishte parashikuar që të votohej edhe projektligji për magjistratët.
Ashtu siç edhe gazeta e paralajmëroi, kreu demokrat Lulzim Basha dhe kryetarja e LSI, Monika Kryemadhi, duke ju frikësuar faktit se gjatë votimit të projektligjeve në Kuvend, brenda grupeve të tyre mund të kishte rrjedhje votash, i detyruan deputetët që të braktisnin seancën. Duke ripërsëritur skenarin e pak javëve më parë, kreu i grupit parlamentar i PD, Edmond Spaho e justifikoi bojkotin e Kuvendit me faktin se opozita po i ndërmerr këto veprime si një shenjë proteste kundër ligjit të teatrit. “Ne duam të rivotohet ligji për prishjen e teatrit Kombëtar sepse një nga deputetët e mazhorancës kishte votuar edhe për një deputet të opozitës.
Dhe kryetari i Kuvendit porositi që të mblidhej këshilli i votimeve dhe procedurave, i cili u mblodh dhe vërtetoi qëndrimin e opozitës që votimi në emër të një deputeti të opozitës ishte kryer pavarësisht nga pretendimet e palëve se kush e kishte kryer. Sa kohë që ky votim ka qenë i parregullt në përputhje me rregulloren duhet të përsëritet.
Për rrjedhojë në emër të grupeve të opozitës, kërkoj që të rivotohet ligji për teatrin pasi ka qenë i parregullt. Për shkak se ju nuk lejoni që të korrigjohet ky veprim i gabuar nga ana e Kuvendit, në shenjë proteste, ne do largohemi nga kjo seancë pasi nuk mund të qëndrojmë në një kuvend ku vidhet vota edhe kur nuk ka nevojë për ta bërë këtë”, tha kreu i grupit parlamentar i PD, Edmond Spaho.
Por pavarësisht këtij fakti, ajo ç’ka bie në sy është se opozita, ka injoruar edhe thirrjet e ndërkombëtarëve për të dhënë konsensus në lidhje me projektligjin e magjistratëve.
Dështon sërish ligji për kompetencat e KLD
Braktisja e Kuvendit nga ana e opozitës ka bërë që të dështojë sërish projektligji për magjistratët. Projektligji në fjalë, kërkon 84 vota dhe ka të bëj me rikthimin e kompetencave të KLD për emërimin e magjistratëve të rinj. Në pamundësi të votave për t’i miratuar këto projektligje, mazhoranca vendosi dje që ta shty votimin për në seancën pasardhëse.
Vetë kreu i grupit parlamentar i PS, Taulant Balla, pas largimit të opozitës, teksa mori fjalën për procedurë, i kërkoi kreut të Kuvendit që të shtyhen për në seancën e të hënës ndryshimet në ligjin e statusit të gjyqtarëve dhe prokurorëve si dhe ato të Kodit Rrugor. “Propozoj që për hir të një dialogu të rëndësishëm me një pjesë ende të përgjegjshme të opozitës propozimi i deputetit Ndreu dhe ai për ndryshimet në ligjin për statusin e gjyqtarëve dhe prokurorëve të shtyhen për seancën e datës 23. Duke shpresuar që kolegu Spaho nuk do vijë më të mbajë vjershën e radhës se në Kuvend në seancën e 5 korrikut paska ndodhur hataja më e madhe për demokracinë”, u shpreh Balla. Sakaq, Balla u shpreh optimist se opozita deri ditën e hënë opozita do të ketë ndryshuar qëndrim dhe se do të jap konsensusin e saj në projektligjin për magjistratët.
“Për projektligjin për disa ndryshime në kodin rrugor diskutimi quhet i ezauruara, kjo mbartet vetëm për votim. Kurse për ligjin tjetër besoj dhe shpresoj që opozita ditën e hënë të ketë reflektuar mbi këtë kërkesë dhe detyrimin që ka Kuvendi në kuadër të vijimit të implementimit të reformës në drejtësi të vijojmë ta kemi çështje të hapur për diskutime ku mirëpresim dhe diskutimet e opozitës”, tha ai./Endri ARIZI
