Kreu i opozitës Lulzim Basha ka shpallur armik disa media në vend, duke urdhëruar të gjitha strukturat e Partisë Demokratike që të refuzojnë debatet, diskutimet apo komentet publike për këta media duke nxitur urrejtje ndaj tyre.
Mediat e shkruara raportojnë se urdhëri i Bashës është dërguar me email tek të gjitha strukturat e PD duke përmendur edhe emra konkretë.
Pjesë e emrave është edhe gazeta “TemA” e cila ka qenë kritike me mënyrën se si kryedemokrati po drejton një ndër forcat kryesore dhe me histori për vendin.
Shkresën e dërguar me email, e cila ka dy faqe, sipas gazetës Mapo, Lidershipi i Partisë Demokratike ua ka dërguar anëtarëve të Këshillit Kombëtar, Kryesisë, dhe ish-deputetëve. Bëhet fjalë për një memo, një material për qarkullim të brendshëm, ku jepen porosi lidhur me strategjinë e komunikimit.
Në shkresë flitet për sondazhet e PD dhe po ashtu jepen “këshilla” për qëndrimet politike mbi çmontimin e asaj që e quajnë propagandë të Edi Ramës. Letra përmend emra gazetarësh dhe mediash, që sipas PD përdoren nga Rama, dhe po ashtu, ata që cilësohen mercenarë politikë.
“Për të sulmuar me shpifje dhe të pavërteta PD dhe lidershipin e saj, Edi Rama, pas konsultimit të madh të Mero Bazes dhe Skënder Minxhozit, prej shumë vitesh në shërbim te pushtet te Edi Ramws, ka hedhur në skakierën antiopozitare edhe Sokol Ballën me portalin Realstory”, deklaron Basha në shkresën e tij.
