Partia Demokratike do të nisë këtë javë përgatitjet për sesionin ri parlamentar, por duket se këtë herë raportet e saj me aleatët do të jenë më të ndrydhura.
Në analizën e bërë për humbjen e zgjedhjeve, aleatët akuzohen se nuk punuan si duhet dhe kjo ka shkaktuar krisje të marrëdhënieve. Por ndarja më e madhe është mes PD dhe LSI.
Këto dy parti 4 vite më parë u bënë bashkë në Parlament, por këtë herë sinjalet janë për një ndarje mes tyre. LSI kishte 19 deputetë në 2017, por tani ka vetëm 4 dhe PD-ja nuk ka asnjë interes më nga kjo parti. Sot mblidhet Këshilli Kombëtar i PD, i cili do të zgjedhë Kryesinë, nënkryetarët, kreun e grupit të PD dhe Sekretarin e Përgjithshëm. Pra Basha do të zgjedhë ekipin tij në Parlament.
Gazeta u interesua pranë PD dhe aleatëve të saj dhe sipas informacioneve, Basha nuk ka asnjë kontakt me LSI sa i takon mundësisë për një koordinim me partinë e presidentit për Parlamentin e ri. Po ashtu edhe me aleatët tradicionalë nuk ka pasur asnjë komunikim, por që këta të fundit presin që para mbajtjes së seancës së parë plenare të mbahet një mbledhje grupi dhe aty të diskutohet për sesionin e ri. Kohët e fundit është vënë re një ndarje thellë mes Bashës, Metës dhe Kryemadhit.
Pas zgjedhjeve baza demokrate akuzoi LSI si fajtore të humbjes, pasi u katandis në 4 mandate. nga ana tjetër vetë LSI akuzoi PD, pasi Kryemadhi u pendua që dogji mandatet duke hedhur dyshime për një puç nga lideri demokrat. Me shumë gjasë Parlamenti i ri nis më 9 shtator dhe aty do shihen raportet e PD dhe LSI. Deri më tani nuk ka pasur reagime nga asnjëra palë, por shanset për një bashkëpunim të ri janë të pakta.
Krisjet e raporteve mes PD dhe LSI
Pas zgjedhjeve të 25 prillit, LSI nisi të fajësojë edhe PD për disfatën që pësoi. Vetë Meta në një konferencë shtypi sulmoi drejtpërdrejt Bashën. “Ai Kuvend është turpi i gjithë atyre që e krijuan bashkë dhe e përjashtoj veten time në mënyrë kategorike nga ajo gjë që ka ndodhur atë ditë që unë kam qenë Gjermani dhe më pas, është një nga faqet më të errëta, më të zeza në dy vite e ca, ai Kuvend.
E faqen e zezë të gjithë ata që mund ta kenë bërë me ndërgjegje që i dhanë Shqipërisë këtë gjë dhe që e nxorën presidentin e republikës në pritë, jo Ilir Metën. Sepse e lanë pa asnjë mbrojtje institucionale Republikën e Shqipërisë”, tha presidenti. Nga ana tjetër edhe Monika Kryemadhi pak ditë pas zgjedhjeve goditi Bashën për djegien e mandateve. Ajo i kërkoi falje Metës duke u distancuar nga PD.
“Makineria mediatike, politike-oligarkike kundër LSI që nuk ndaloi që në momentin ne zbatuam një strategji që pati pasoja në këtë rezultat, që nga djegia e mandateve, mosmarrja pjesë në zgjedhje dhe dashje pa dashje i dhamë Ramës të gjitha pushtetet”, tha ajo.
