Ashpërsohet konflikti mes kryeministrit Edi Rama dhe kreut të PD Lulzim Basha. Pas akuzave në rrjetet sociale, mazhoranca ka bërë një tjetër hap para, pasi kërkon hetim të rolit që ka pasur Basha në UNMIK.
Ditën e djeshme kreu i grupit parlamentar Taulant Balla ka nisur mbledhjen e firmave për të ngritur një komision të posaçëm parlamentar, i cili do të hetojë pretendimet për burgjet e UÇK. Prej ditësh Rama ka akuzuar Bashën, por mungesa e sqarimeve të tij dhe faktet se ai ka pasur rol në hetimin eliderëve të UÇK, kanë shtuar dyshimet. Për këtë arsye PS ka iniciuar një komision kundër liderit demokrat.
Në kërkesën e dërguar në Kuvend thuhet: “Kërkesë për krijimin e një komisioni të posaçëm. Nisur nga debatet e ditëve të fundit në media e më gjerë për një çështje tejet të rëndësishme për opinionin publik, vendas dhe të huaj në lidhje me raportin e Dick Marty-t, të paraqitur në Asamblenë Parlamentare të Këshillit të Europës (“APKiE”), mbi të cilin është miratuar Rezoluta 1782 (2011) e APKiE
“Investigime të pretendimeve për trajtim çnjerëzor dhe trafik të paligjshëm organesh njerëzore në Kosovë”, proces ky i nisur që me mocionin për një rezolutë datë 15.04.2008, Dok. nr. 11574, paraqitur nga anëtari i APKiE në atë kohë, Konstantin KOSACHEV, përfaqësues i Federatës Ruse, Grupi Europian Demokrat, dhe duke marrë shkas nga: shënimet e këtij raporti rreth rolit në luftën për çlirimin e Kosovës të disa drejtuesve të Ushtrisë Çlirimtare të Kosovës… kërkojmë ngritjen e një komisioni të posaçëm”.
Gazeta ka mësuar se një vëmendje e veçantë do i kushtohet angazhimeve të Lulzim Bashës në UNMIK. Mazhoranca pretendon se Basha ka ndihmuar Dick Marty-n që të hartojë raportin për “Shtëpinë e Verdhë”.
Akuzat e Ballës
Ishte kreu i grupit të PS, Taulant Balla, ai i cili sulmoi ashpër dje liderin e PD. Sipas Ballës faktet tregojnë qartë se ai ka pasur rol në fabrikimin e akuzave ndaj liderëve të UÇK. Balla tha se ai duhet të japë menjëherë sqarime. Nga ana tjetër, Balla u shpreh se Basha rrezikon të merret edhe si dëshmitar.
“Lulëzim Basha i detyrohet një përgjigje shqiptarëve në Shqipëri, Kosovë e gjetkë, ku duhet të sqarojë rolin e tij tepër të dyshimtë e tinzar në lidhje me hetimin e luftës së UÇK si dhe në lidhje me të ashtuquajturat “burgjet e UÇK” në Shqipëri. Jam i bindur që këtë detyrim nuk do ta bëjë, por të paktën tu kthejë përgjigje demokratëve, të cilët duhet të dinë rolin e Kryetarit të tyre de jure në këtë maskaradë anti-kombëtare, ku viktimat e gjenocidit serb po trajtohen si kriminelë, e ku lufta çlirimtare po akuzohet për krime lufte.
Lulëzim Basha rezultoka të ketë futur në Shqipëri fshehurazi si turist ekspertin e OKB dhe duhet të shërbejë si dëshmitar i penduar kundër shpifjeve e trillimeve ndaj luftës së UÇK. Në këtë video është gjithçka e qartë”, tha Balla dje.
Eksperti i OKB fundos Bashën
Akuzat e bëra në drejtim të kreut të PD së fundmi, i konfirmoi pak ditë më parëedhe eksperti i OKB-së, antropologu ligjor Jose Pablo Baraybar, me origjinë peruane. Në një intervistë ai tregoi se e njihte liderin demokrat pasi kishte punuar me këtë të fundit.
Eksperti i OKB që ka punuar në shumicën e skenave të krimeve të luftës në Bosnje, Kroaci dhe Kosovë ka mundur të hyjë dy herë në Shqipëri, duke u prezantuar si turist apo inxhinier rrugësh në shkurt të vitit 2004, për të vizituar “Shtëpinë e Verdhë”, në veri të vendit, e përmendur edhe në raportin e Dick Marty, për trafik organesh.
Ai tregonte në vitin 2010 se si mundi të vijë në Shqipëri dhe se kush ishte përkthyesi që e shoqëroi.“Përkthyesi im quhej Lulzim Basha. Ai punonte për Gjykatën Penale Ndërkombëtare për ish-Jugosllavinë. Më pas u bë ministër i Punëve Publike në Shqipëri dhe e kam dëgjuar vitin e kaluar të thotë se kjo histori e organeve ishte broçkulla. Ndërkohë që unë e di që ai e di. Ai ishte me mua. Ai kishte dosjen”, u shpreh ai.
