Dorëzimi i detyrës së kryebashkiakëve në largim të PD-LSI duket se do të rikthej edhe një herë përplasjet politike. Kreu demokrat Lulzim Basha u është rikthyer takimeve me qytetarët në bazë dhe për herë të parë ka lënë të nënkuptohet se kryebashkiakët nuk do të dalin nga zyrat. Nga Selenica e Vlorës ku zhvilloi takimin me strukturat, Basha i ka cilësuar zgjedhjet e 30 qershorit si farsë dhe ilegjitime.
Sipas tij, PD tashmë e ka një plan për të dalë nga kriza që prej disa muajsh ka kapur vendin. “Refuzimin e 30 qershorit do ta kthejmë në një energji për ndryshimin e pashmangshëm dhe të pandalshëm që po vjen për Vlorën dhe gjithë Shqipërinë. I shpreh mirënjohjen çdo vlonjati dhe vlonjateje që refuzoi në mënyrë ekzemplare farsën e 30 qershorit dhe i dha një mesazh të fuqishëm regjimit të hajdutërisë dhe krimit me 30 qershor. PD dhe opozita e shikon 30 qershorin dhe refuzimin referendar të farsës së Edi Ramës jo si triumf, por si përgjegjësi për ta kthyer në një ndryshim për të gjithë shtresat e shoqërisë që do të kenë nga PD një plan të qartë për daljen nga kriza”, tha Basha. E duke iu referuar zgjedhjeve të 30 qershorit, kreu demokrat ka kërkuar nga kryebashkiakët aktual që të mos i lirojnë zyrat. “Kryetari legjitim i Bashkisë së Selenicës është Përparim Shameti dhe ai do të jetë në këtë pozicion derisa në vend të mbahen zgjedhje të rregullta e demokratike, në të cilat ai do të rikonfirmohet si kryebashkiak i Selenicës”, u shpreh Basha.
PD-LSI qëndrim të ndryshme për 13 tetorin
Partia Demokratike është e vendosur për të mos hyrë në zgjedhje për sa kohë që nuk përmbushen kushtet e tyre për zgjedhje të lira dhe të ndershme. Por përmes kësaj vendosje, duket se Basha është distancuar nga Monika Kryemadhi. Kjo e fundit së bashku me të gjithë zyrtarët e Lëvizjes Socialiste për Integrim kanë shprehur vendosmërinë për të hyrë në zgjedhjet lokale të 13 tetorit, të dekretuara nga presidenti Ilir Meta. Ndërkohë që, kryedemokrati Lulzim Basha jovetëm që nuk e ka komentuar përplasjen Rama-Meta, por është shprehur se nuk hyn në zgjedhje pa u plotësuar më parë kërkesat e artikuluar nga ai. Pra, duket qartë mes Bashës dhe Kryemadhi ka një distancim nga njëri-tjetrin. Kjo u pa edhe gjatë protestës të 8 korrikut, ku Partia Demokratike dhe Lëvizja Socialiste për Integrim treguan se janë të pakoordinuara në qëndrimet e tyre.
Basha takon kryebashkiakët
Ndërkohë që ditën e djeshme kreu demokrat mblodhi në selinë blu Kolegjin e Kryetarëve dhe kryetarët e 15 bashkive të djathta. Sipas burimeve të gazetës, mësohet se Basha i ka lënë porosi drejtuesve të degëve të PD-së që në 10 ditë të jenë të fokusuar vetëm në takime me strukturat me synim për të mbajtur me energji qytetarët në rast se do të ketë protestë tjetër kombëtare. Basha ka lënë gjithashtu porosi që strukturat e PD-së të ndihmojnë në mosdhënien e detyrës për pasardhësit socialistë nga ana e kryetarëve të bashkive të djathta në 10 gusht, sikurse parashikon Kodi Zgjedhor. PD do të vijoj me aksionin opozitar kundër qeverisë edhe gjatë muajve të verës. Për PD dhe aleatët korriku dhe vera nuk do të jetë periudhë pushimesh, por do të shoqërohen me aksion intensiv./Elisjeda KIKO
