Bashkia Tiranë ka vendosur të heqë bonusin e qirasë për dhjetëra familje të prekura nga tërmeti. Pas dëmeve që solli tërmeti i viti 2019 në shumë familje shqiptare, qeveria vendosi të lëvrojë bonus qiraje për ata që iu është dëmtuar shtëpia.
Në atë vendim është theksuar se, do të marrin bonus qiraje qytetarët që iu është shpallur banesa e pabanueshme dhe nuk kanë se ku të qëndrojnë tjetër. Në bazë të këtij urdhri ka vepruar edhe Bashkia Tiranë, por në kohët e fundit, në bazë të denoncimeve të bëra është vërejtur se disa familje kishin aplikuar për bonus qiraje edhe pse shtëpia e tyre ishte e banueshme ose kishin një tjetër banesë se ku mund të qëndronin.
Për këtë arsye, bashkia ka bërë vëzhgimet e nevojshme dhe ka vendosur të ndërpresë bonusin e qirasë për këto familje që kanë përfituar padrejtësisht. Lajmin e ka bërë dje të ditur kreu i bashkisë, Erion Veliaj, i cili tha se është marrë vendimi për ndërprerjen e qirasë për muajt e ardhshëm dhe sqaroi se kjo situatë është krijuar nga papërgjegjshmëria e këtyre familjeve.
“Kemi pasur disa raste si shkelje, merrnin bonuse dhe rrinin në shtëpi. Kur merr bonusin dhe asaj shtëpie apo pallati nuk i ka ardhur radha të riparohet, KLSH thotë që bashkia po paguan dikë që nuk po e përdor për qira. Shkelja në disa raste ka qenë flagrante.
Programi i bonusit është social, i jepet dikujt që ka nevojë. Kanë qenë vetë qytetarët që dispononin dy shtëpi, pra ka një shtëpi alternative dhe kur i jep bonus qiraje është shkelje. Pasi ky bonus mund të jepej tjetrit që ka nevojë. Auditi ka zbuluar 40 raste të tilla”, deklaroi ai.
Zgjidhet ngërçi i vonesave
Bashkia Tiranë pranoi se në muajt e kaluar ka pasur një ngërç për dhënien e bonusit në disa zona. Sipas kreut të bashkisë shkak për këtë u bënë vonesat në posta dhe për këtë bashkia u ka “tërhequr veshin” punonjësve të saj. Sakaq, ai sqaroi se në muajin e shkuar u zgjidh kjo çështje dhe banorëve që ishin në pritje iu janë dhënë përnjëherë bonusi i dy muajve.
Veliaj tha se për çdo lloj vonese është zgjidhur problemi dhe janë kryer tashmë pagesat. “Në një rast tjetër ka qenë një vonesë e postës që ka pasur një mungesë. Ka pasur vonesë 4-5 ditë, maksimumi një javë dhe duhet ta pranojmë që ishte faji ynë, i shtetit. Por ne e zgjidhëm këtë çështje u lëvruan më pas bonuset për dy muaj. Rastet e shkeljeve janë më pak, por u rikuperuan, u bënë pagesat”, tha Veliaj.
62 banesa përfundojnë në gusht
Ndër të tjera Bashkia Tiranë ka treguar se 62 shtëpitë përfundojnë në gusht dhe në fillim shtatori këto familje do të gëzojnë banesat e reja. Veliaj tregoi gjatë intervistës se bashkia po punon dhe për ndërtimin e dy lagjeve të reja më pranë Tiranës, ku nuk do të strehohen vetëm të prekurit nga tërmeti, por edhe ato familje që janë në zona periferike ku nuk kanë akses shërbimet publike si rrugë; ujë e të tjera.
Sipas tij bashkia do të ndihmojë këto familje të lënë pas varfërinë dhe të integrohen. “Sa i përket rindërtimit janë disa ndërhyrje pikësore. Janë rreth 62 shtëpi individuale dhe në fund të gushtit do i mbyllim. Ka dhe ndërtime masive, siç është zona e re urbane në Vaqarr është edhe lagja e re në Ndroq. Arsyeja pse themi lagje të reja, është sepse i dedikohet personave që nuk kanë jetuar më parë aty. Bëhet fjalë për të transferuar familje”, deklaroi kreu i Bashkisë Tiranë./SHKRUAR NGA ESMERALDA HIDA
