Burime nga Drejtoria e Policisë Tiranë konfirmojnë se më datë 9 janar është ndaluar qytetari Ilir Dokle, i cili është pyetur në lidhje me rolin e tij në organizimin e basteve sportive në vend. Dokle është aksioner i Eccobet, shoqëria kryesore e basteve sportive deri më 31 dhjetor, por njëherazi është dhe programuesi kryesor në Shqipëri për plataformat e basteve online.
Ndalimi i tij vjen në një moment kyç të luftës së qeverisë “Rama” me bastet ilegale online. Dokle ka dhe një shoqëri tjetër, Trinissoft, e cila merret pikërisht me zhvillimin e sistemeve të basteve. Pas 4 orësh pyetje, Dokle është lëshuar për t’u ndjekur më pas në gjendje të lirë nga Drejtoria për Hetimin e Krimit Ekonomik e Financiar.
Autoriteti i Mbikëqyrjes së Lojërave të Fatit (AMLF) ka reaguar së fundmi në bashkëpunim me AKEP-in për bllokimin dhe ndalimin e faqeve të internetit, që mundësojnë zhvillimin e basteve sportive online.
Ndalimi i Dokles është një përshkallëzim në këtë betejë dhe konfirmon vullnetin e qeverisë në këtë drejtim, duke qenë se platformat dhe sistemet e basteve sportive janë motori që fshihet pas faqeve online. Burime nga Drejtoria e Policisë sugjerojnë se në Shqipëri operojnë të paktën tre shoqëri të tilla.
