Opozita shqiptare ka marrë dje një goditje fatale sa i takon djegies së mandateve dhe skenarëve destabilizues. Teksa Basha e Kryemadhi i kishin shpresat te ndërkombëtarët për të bindur Ramën të shkojë te zgjedhjet e parakohshme apo qeveria teknike, dje kjo ëndërr ka marrë fund. Që mbrëmjen e së mërkurës në Tiranë mbërriti një delegacion me 7 eurodeputetë, të cilët u informuan mbi realizimin e reformave, por dhe për situatën politike. Gjatë një konference për shtyp, të gjithë dolën hapur kundër djegies së mandateve, ndërsa rrëzuan çdo alibi të opozitës.
Por goditja më e madhe që ju bë Bashës, Berishës e Kryemadhit ishte fakti se eurodeputetët dolën kundër qeverisë tranzitore. Sipas tyre absolutisht që nuk duhet të ndodhë kjo, pasi dëmton reformat. “Ne e kemi diskutuar këtë ide, por Parlamenti është zgjedhur në mënyrë të ligjshme. Ju keni një qeveri legjitime dhe mendoj se një qeveri e përkohshme do dëmtonte hapjen e negociatave. Në asnjë mënyrë nuk duhet të ndodhë”, tha Knut Fleckenstein. Në të njëjtën linjë me të ishin dhe eurodeputetët e tjerë.
“Parlamenti është legjitim. Nuk mendoj se rastet e izoluara të blerjes së votave kanë ndikim në panoramën e ligjshme me përjashtim të rasteve kur vendos gjykata. Megjithatë me gjërat që janë tani mendoj se duhet të vazhdojmë me këtë Parlament”, tha Tunne Kelam.
BE hap rrugën për shkrirjen e PD-LSI
Përveç kritikave, 7 eurodeputetët kanë hapur dje rrugën për daljen përfundimtare nga politika të Bashës, Berishës e Kryemadhit. Ata dolën kundër zgjedhjeve të parakohshme dhe qeverisë teknike, ndërsa deklaruan se në Parlament do futen emra të rinj. Pra në një farë mënyre, edhe vetë ndërkombëtarët nuk duan më që ky vend të mbetet peng i 3 personave. Kjo do të thotë se tani është vetë BE që do kërkojë të krijohet një opozitë e re, duke shkrirë PD e LSI.
“Sa i përket problemeve tuaja të brendshme, ne nuk kemi dyshim që ky Parlament do të vazhdojë rrugëtimin e tij. Parlamenti do të vazhdojë rrugëtimin, ndoshta edhe me anëtarë të rinj. Presim që deputetët të bëjnë punën e tyre dhe të kthehen në Parlament. Edhe sikur opozita të ketë të drejtë për akuzat, bojkotimi nuk zgjidh asgjë”, tha Fleckenstein.
Basha merr goditja nga PPE
Kreu demokrat Lulzim Basha ka marrë goditje dhe nga Partitë Popullore Europiane. Përfaqësuesi i tyre, Christian Preda, hodhi poshtë të gjitha pretendimet për manipulimin e zgjedhjeve. “Bojkoti për ne është i papranueshëm. Braktisja i mandateve është e papranueshme për ne. E kemi thënë kur ishte partia e Ramës ajo që bojkotoi dhe përsërisim këtë qëndrim edhe sot. Unë kam qenë vëzhgues në zgjedhje dhe përfundimet tona ishin se zgjedhjet shkuan mirë dhe nuk mund të themi pas një viti e gjysmë që zgjedhjet nuk ishin të mira.
Kur e dëgjoj këtë nga disa parti dhe ata thonë që përfundimet e bëra nga zyrtarët europianë nuk janë korrekte mërzitem sepse ne kemi ekspertizën dhe përvojën më të mirë në botë që respektohet në të gjithë botën. Për mua është çudi që të dëgjoj politikanët shqiptarë që zgjedhjet në 2017 kanë qenë të këqija nuk di çfarë do të thotë kjo gjë. Ju lutem respektoni rezultatet e zgjedhjeve dhe bëni punën. Ne mbështesim idenë për çeljen e negociatave. Besojmë që hapen negociatat por duhet të keni negociata të brendshme dhe dialog të brendshëm”, tha ai.
PD-LSI, interesa personale
Një goditje ndaj PD e LSI dha dhe kreu i delegacionit, Tunne Kelam, i cili u shpreh se djegia e mandateve është lëvizje për interesa personale. “Zgjedhjet janë të njohura, janë pranuar, dhe duhet aderuar në institucione. Bojkotimi i Kuvendit, në vetvete përbën një sinjal shumë të keqe, cenon besueshmërinë e kombit dhe të shtetit. Ne nuk jemi dakord që bojkotimi i Kuvendit do të ishte gjëja e duhur për tu bërë. Nuk mund të gjesh dot një arsye, një pretendim për të penguar anëtarësimin, nga interesa partiake”, theksoi ai. Për protestat Kelam tha se është absolutisht kundër dhunës, si një mënyrë jo demokratike për zgjidhjen e problemeve, e po ashtu kundër nxitësve politikë të dhunës.
“Kemi ardhur këtu në atmosferën e shpresë. Ne jemi të interesuar që Shqipëria të hapë negociatat. Ky është një objektiv i rëndësishëm. Të gjitha problemet mund të zgjidhen brenda BE. Nuk duhet të ketë asnjë mosmarrëveshje për shkak të problemeve kombëtare”, vijoi ai.
Reforma në drejtësi
Shefi i delegacionit të Parlamentit Europian në Tiranë, Tunne Kelam, deklaroi se reforma në drejtësi është kryesorja për hapjen e negociatave. “Ne vlerësojmë që reforma gjyqësore ka bërë progres por gjëja kryesore është zbatimi. Nuk mund të realizohen të gjitha reformat në të njëjtën kohë. Gjithsesi fillimet për reformat janë bërë dhe Shqipëria është në rrugën e drejtë”, u shpreh ai. Ndërsa Fleckenstein tha se do kërkojë nga Këshilli i BE që të bazohet pikërisht te ky proces dhe jo te aktualiteti politik për vendimin për negociatat. Vlerësime pati dhe nga ambasadori Soreca.
“Reforma në drejtësi është në rrugën e duhur. Këshilli i Lartë i Prokurorisë, Këshilli i Lartë Gjyqësor janë krijuar tashmë dhe kanë marrë dhe strukturën dy ditë më parë nga parlamenti, ndërkohë që thirrja për aplikimet për SPAKU-në ka qenë e suksesshme me 27 aplikime për 15 vende vakante”, tha ai./Kliti Topalli
