Mohimi i bashkëpunimit nga Lulzim Basha me Milaim Bellanicën, siç është thënë për ta zbardhur të vërtetën mbi ma sakrën e Krushës së Madhe e ka befasuar këtë të fundit.
Zotëri Bellanica ne kemi realizuar bashkë një intervistë në të cilën ju thoni se kasetën me 45 minuta xhirime nga Ma sakra e Krushës ia keni dhënë Lulzim Bashës. Por ky i fundit ka bërë një deklarim ku e ka mohuar këtë…
“Lulzim Basha ti shumë mirë po flet ama ti e di shumë mirë që e ke atë xhirim që unë e kam bërë vete, kur ke ardhur në Kukës ke ardhur me helikopter dhe më ke thanë më mirë ruhen tek unë si punëtor i Hagës.
Unë po befasohem qysh po mundesh me thanë që po gënjej personi që jam adekuat, jam gjallë, mua më ke drejtë për së drejti unë nuk të iki ty, ti je ka ik nga unë”, tha Bellanica për Top Channel.
Ai tregon se në gusht të vitit 2004 ishte paraqitur tek selia e PD-së në Tiranë, ku e kishte takuar Bashën në cilësinë e anëtarit të partisë.
“Atë ditë më ka thanë nuk shkon gjatë eventualisht një muaj të kthehet ajo sepse duhet të shkoj në Holandë të takohem më prokurorin e gjyqit të Hagës, mirëpo shkuan 8 vite, 18 vite pa i kthyer xhirimet, pa më thanë as një fjalë, tash e ka pas zorin e po reagon po thotë Milaim Bellanica është gënjeshtar. Lulzim Basha po del që po i përkrah forcat serbe”, tha ai.
Në mungesë të bashkëpunimit ai i ishte drejtuar prokurorisë, më saktësisht kryeprokurorit, Arben Rakipit.
“Arben Rakipi më ka thënë që nuk mundem me të ndihmua asgjë, këtë aspekt nuk mundemi, e tash po del që edhe ai ka qenë bashkëpunëtor i Lulzim Bashës. Unë kam kërkuar me i realizu premtimet që i kanë pas ndaj meje”, tha ai.
Madje, ai pretendon se me Bashën kishte një marrëveshje të nënshkruar që në prill të 99-ës, përmes së cilës kishte pranuar dhënien e dëshmive në këmbim të mundësisë së largimit nga Shqipëria për në perëndim, gjë e cila nuk kishte ndodhur.
