Sali Berisha, në “Intervistë” me Merita Haklajn, në A2 CNN, theksoi se “vendimi i shpalljes “non grata” pa fakte, pa dokumente dhe pa baza nuk pranohet nga askush”.
“Unë jam në kontakt me përfaqësues kryesorë të forcave konservatore në Europë dhe eksponentë kryesorë të konservatorizmit në Europë kanë mirëpritur zhvillimet në Partinë Demokratike.
E njëjta gjë edhe me konservatorët amerikanë sepse kjo është një betejë kundër armikut të përbashkët të konservatorizmit: George Soros”, deklaroi Berisha.
“Unë nuk kam kërkuar ndihmë, pasi vendosa që ta mbaj çështje private dhe të shkoj në gjykatë. Unë kam dërguar informacion çdo ligjvënës amerikan për shkeljen dhe abuzimin me ligjin e Kongresit të SHBA-së, pasi ky ligj nuk është miratuar për të ndëshkuar njerëz pa prova. Jap informacion për këtë akt të pabazuar në fakte edhe vende të tjera të lira”, shtoi ish-kryeministri.
Sipas tij, “historia nuk njeh rast të ngjashëm, që një njeri që nuk ka pasur akuza, të shpallet “non grata” nën ndikimin e lobimit korruptiv të George Soros”.
“Unë e mbështes plotësisht ndihmën amerikane për luftën kundër korrupsionit, por theksoj që përdorimi i saj për qëllime politike, është fatalisht mbështetje që zyrtarë të caktuar po i bëjnë korrupsionit.
Unë kam 8 vite që nuk kam fuqi vendimmarrëse, kam 0 akuza ndaj meje për korrupsion, askush nuk e ka luftuar korrupsionin në vendin tonë saç kam bërë unë.
Historia nuk njeh rast të ngjashëm, që një njeri që nuk ka pasur akuza, të shpallet “non grata” nën ndikimin e lobimit korruptiv të George Soros. Nuk besoj se ky është një rast që i shërben luftës kundër korrupsionit”, u shpreh Berisha.
