Ka një debat për taksën e Rrugës së Kombit, ka dhe një protestë të qytetarëve për këtë taksë. Duke i hequr protestës dhunën dhe hipokrizinë e opozitës që e nxit këtë dhunë, kërkesat e qytetarëve të Kukësit janë të drejta. Për shumë arsye ata ndjehen të tradhtuar nga politika, nga qeveritë e radhës dhe nga tërë soji e sorollopi që u shërben.
Ata njëherë u mashtruan kur u bë Rruga e Kombit. Shteti shqiptar jo vetëm që shpenzoi qimet kokës për një rrugë që nisi dhe u bitis pa asnjë projekt, studim fizibiliteti apo studim të gjeodezëve, por si përfundim nuk është akoma rrugë normale e jo më autostradë. Megjithëse thuhet që shpenzimi ka arritur deri më tani 1.5 miliardë euro.
Pra u ndërtua një rrugë e zakonshme, më shumë rrugë elektorale. Qeveritarët në atë kohë morën lekë pafund nën dorë dhe në fund të herës u la në “derë” një rrugë, e cila nuk ka as rrugë dytësore, nuk ka as nënkalime e mbikalime për banorët e zonës së Mirditës e Kukësit ku kalon. Kjo është tradhtia e parë.
Tradhtia e dytë është vendosja e taksës pa pyetur dhe diskutuar me askënd. E filloi ish kryeministri Sali Berisha, i cili pasi shpenzoi gati 1.5 miliardë euro për këtë rrugë, në fund tenderoi tre herë pa sukses dhënien me koncesion të mirëmbajtjes dhe për pasojë dhe të taksimit. Madje deri në 9 euro për 100 kilometra rrugë.
Duke qënë se nuk arriti, ia la në “derë” Edi Ramës kryeministër. Dhe ai veproi si Berisha, tenderoi rrugën dhe vendosi taksën. Nuk është se duhet rrugë pa taksë. Asnjëherë. Por në radhë të parë duhet diskutuar dhe nuk duhet vepruar si Berisha që nisi rrugën pa projekt. Kështu që dhe Rama bëri të njëjtin gabim, taksoi rrugën pa projekt.
Vetëm disa ditë pas protestës në Kukës ka nisur ta diskutojë dhe debatojë, duke shtuar dhe dimensionin social. Por kjo rrugë ka marrë “nën vete” dhe buxhetin e shtetit shqiptar. Në fillim kur u bë, ku u shpenzuan 1.5 miliardë euro, u vodhën 250 milionë euro me një dorë, dhe tani me mirëmbajtjen dhe taksimin. Të gjitha këto para janë në kurriz të shqiptarëve dhe taksapaguesve për t’u paguar.
Meqë jemi tek 250 milionë eurot e vjedhura nga ish kryeministri Sali Berisha dhe ish ministri i atëhershëm i Transporteve, sot kryetar i PD Lulzim Basha, duke të sqarojmë disa detaje. E para, shuma 250 milionë euro të vjedhura nuk ka qënë akuzë e opozitës së atëhershme të kryesuar nga Edi Rama.
Këtë shumë e ka evidentuar me “sy të lirë” Kontrolli i Lartë i Shtetit, drejtues i të cilit në atë kohë ka qënë Robert Çeku, ish deputeti i Berishës dhe që la mandatin për të marrë këtë detyrë. U zgjodh me votat e grupit parlamentar të PD dhe të aleatëve të saj në këtë detyrë. KLSH nuk hyri fare në përllogaritjen e volumit të punimeve pasi shuma që ishte vjedhur nga Berisha dhe Basha do të dilte akoma më e madhe. KLSH vetëm bëri diferencën mes 22 milionë eurove që kishte bërë një kilometër rrugë nga Rrësheni në Kalimash, dhe 4 milionë eurove për një kilometër që bëri rruga nga Kalimashi në Morinë.
Thjesht dhe vetëm bëri diferencën me plus minuset e veta, duke arritur në përfundimin se janë vjedhur 230-250 milionë euro nga kjo rrugë. Berisha dhe Basha i kanë vjedhur, duke i përdorur ato për financimin e partisë, por dhe të xhepave të thellë të tyre. Deri më tani është një dosje e tillë vjedhjeje në prokurori, ku Lulzim Basha shpëtoi me raporte mjekësore pa u gjykuar. U mbyll me procedurë dosja e Rrugës së Kombit atëherë.
Tani ka ardhur koha që dosja të çohet në Gjykatë nga prokuroria. Dosje, e cila me sa dimë është kopsitur nga organi i akuzës. Ajo që mbetet për të bërë është një vendim gjykate për të shpallur dhe zyrtarisht vjedhjen e madhe të parave të kësaj rruge. Nuk shqetësohemi nëse dënohen me burg ose qëndrojnë jashtë qelisë Sali Berisha apo Lulzim Basha. Çështja është më tepër se kaq. Gjithçka ka të bëjë me ekonominë e vendit dhe dimensionin social për banorët e saj.
Në këtë situatë, një vendim gjykate, dhe këtë duhet ta bëjë, në favor të rikthehimit në buxhetin e shtetit të 250 milionë eurove të vjedhura nga Berisha dhe Basha në rrugën e Kombit do të ishte zgjidhja më e drejtë. Eshtë një shumë e konsiderueshme që në këtë situatë përplasjesh dhe protestash, këto para të shërbejnë për mirëmbajtjen e kësaj rruge dhe përjashtimin e banorëve të zonës së Kukësit, Hasit, Tropojës dhe Mirditës nga taksa e rrugës. Ku sipas përllogaritjeve rruga do të mirëmbahej për 10 vite pa nevojën e ndërhyrjes së buxhetit të shtetit.
Por dhe do të përjashtoheshin nga taksa banorët ku kalon rruga për 10 vite rresht. Pa prekur fare buxhetin e shtetit. Një zgjidhje ideale, ligjore dhe shumë ekonomike për shtetin shqiptar. Drejtësia të bëjë ç’të dojë pastaj me Berishën dhe Bashën, vetëm të rikthejë në buxhetin e shtetit 250 milionë eurot e vjedhura në këtë rrugë. E ka përllogaritur dhe deklaruar zyrtarisht KLSH, me specialistët e saj. Kështu do merrte fund dhe përplasja politike, qytetarët do qetësoheshin, rruga mirëmbahej dhe arka e shtetit nuk do prekej./Pamfleti.com
