Sipas informacioneve të gazetës, planet e opozitës ishin që rebelimi kundër qeverisë të niste që në datën 12 shtator, e cila është edhe përkujtimorja e vdekjes së Azem Hajdarit e më pas të vijonin edhe përgjatë datës 13 në sallë plenare gjatë diskutimeve për teatrin. Por një plan i tillë sikur ra poshtë duke qenë se mazhoranca vendosi ta shtynte dekretin e Metës për në datën 20 shtator.
Ligji për prishjen e Teatrit Kombëtar dhe ndërtimin e një godine të re duket sikur është kthyer në shtyllën e aksionit opozitar të Partisë Demokratike dhe Lëvizjes Socialiste për Integrim. Ky dekret fillimisht ishte përcaktuar të shqyrtohej në 13 korrik dhe sipas këtij përcaktimi edhe opozita kishte nisur të planifikonte aksionin e saj.
Por duke qenë se Azem Hajdari ka qenë një figurë shumë e rëndësishme në PD dhe përkujtimorja e vdekjes së tij është po ashtu një ngjarje e rëndësishme, Berisha duket se nuk do të heqë dorë nga skenari për t’i nisur protestat në 12 shtator.
Ai ka filluar t’i bëjë presion Bashës që të ndiqet plani i tij për aksionin opozitar në përvjetorin e vdekjes së Hajdarit. Megjithatë, mbetet për tu parë sesa do të realizohet një gjë e tillë nga Basha sepse ky i fundit edhe në mbledhjen e grupit parlamentar të djeshëm nuk e preku fare temën apo planin për protesta a mosbindje civile.
