Gjyqtarja e Apelit të GJKKO-së Ilirjana Olldashi shtyu për nesër dhënien e vendimit për masën e sigurisë së Sali Berishës. Seanca ka zgjatur rreth 3 orë, ku avokatët mbrojtës e kanë quajtur të paligjshëm vendosjen e masës së sigurisë arrest shtëpie.
Pasi ka dëgjuar pretendimet e avokatëve, si edhe prokurorët që thonë se Berisha duhet të vijojë të qëndrojë në arrest shtëpie, Olldashi ka vendosur që vendimin ta shpallë ditën e nesërme në orën 09:00. Po nesër do të merret në pyetje për aferën Partizani, edhe dhëndri Jamarbër Malltezi.
Berisha ka ankimuar masën arrest shtëpie për aferën ‘Partizani’, si edhe përjashtimin e Irena Gjokës nga çështja e tij, gjyqtares që ka caktuar masën e sigurimit personal ndaj ish-kryeministrit. ‘Liria’ e Berishës është në dorën e gjyqtares Olldashi, e cila liroi nga qelia dhëndrin e tij, Jamarbër Malltezi.
Gjyqtarja Olldashi është në konflikt interesi pasi në vitin 2015 ka blerë apartament me çmim preferencial 712 euro m² në një nga 19 kullat e kompanisë në hetim “Homeplan” ku aksioner është edhe Malltezi, të cilin më herët e liroi nga paraburgimi dhe e çoi në shtëpi.
Konflikti i interesit është pranuar edhe nga SPAK i cili ka bërë rekurs në gjykatë të lartë kundër masës “arrest shtëpie” duke kërkuar kthimin në qeli të Malltezit, i cili akuzohet se ka përfituar 5.4 mln euro nga ndërtimi i kullave.
