Opozita shqiptare bashkë me presidentin Ilir Meta i kanë varur shpresat te Bashkimi Europian, sa i takon betejës së tyre për të larguar kryeministrin Edi Rama. Kreu demokrat Lulzim Basha ka refuzuar protestat dhe po jep sinjale dialogu, mirëpo presionet ndaj tij nga Meta, Berisha dhe Kryemadhi janë rritur ndjeshëm. Sipas burimeve, aksioni opozitar do të varet nga vendimi që do të marrin vendet e BE më 18 tetor.
Opozita pret që të mos ketë hapje negociatash dhe sipas burime nga selia blu, kjo do të shfrytëzohet për të sulmuar qeverinë dhe rinisur aksionin opozitar, të lënë në mes më 30 qershor. Basha nuk i mbështet protestat dhe përplasjet, por mësohet se është vënë në vështirësi nga Berisha së pari, më pas nga Meta dhe nga LSI. Një burim i tha gazetës se ata ja kanë bërë të qartë Bashës se ky moment duhet shfrytëzuar për të rinisur protestat, pasi nëse nuk ndodh tani, atëherë nuk ka për të ndodhur më dhe Rama nuk ka për t’u larguar. Megjithatë mbetet të shihet e sa realisht do jetë ky plan, pasi nuk ka ende një vendim për negociatat. Sot do vendosin ministrat e Jashtëm dhe verdikti final jepet më 18 tetor. Pra në varësi të vendimit që do merret të premten do jetë dhe axhenda e opozitës.
Përplasjet
Gazeta ka mësuar se situata brenda opozitës nuk është aspak e qetë. Kreu demokrat Lulzim Basha është në mbështetje të dialogut me PS dhe nuk i mbështet protestat e dhunshme. Por ndryshe mendojnë Berisha, disa deputetë pranë tij dhe LSI. Kjo e fundit është më e humbura nga gjithë kjo betejë dhe tani të vetmen zgjidhje sheh përplasjet. PD e ka elektoratin e saj bazë, por LSI e ka krijuar elektoratin e saj përmes punësimeve. Me braktisjen e Parlamentit dhe me bojkotin e zgjedhjeve, LSI humbi shumë elektorat. Rasti më i fundit është ai i Skraparit, pasi u shkarkuan nga detyra 80 persona në bllok. Por në mes kanë hyrë dhe ndërkombëtarët. SHBA e BE ja kanë bërë të qartë Bashës se rruga e vetme është dialogu. Kreu i PD ka vënë 5 kushte ndaj qeverisë dhe gazeta ka mësuar se pas 18 tetorit qeveria do të tentojë të gjejë një rrugëzgjidhje. Pra Basha tashmë do jetë mes dy zjarreve. Duhet të vendosë nëse do ulet me qeverinë, ose do vijojë protestat sikundër kërkojnë Meta-Berisha dhe të tjerë. Sido që të jetë, fundi i vitit do jetë me zhvillimet: Ose do të kemi zgjidhje të krizës ose do plasin revoltat në vend.
Paralajmërimi
Ish-deputetja e Partisë Demokratike, Grida Duma, paralajmëroi të shtunën se do të ketë protesta masive dhe radikale, deri në rrëzimin e kryeministrit Edi Rama. Gjithashtu, Duma u shpreh se, nëse Këshilli Europian i thotë “Jo” hapjes së negociatave të Shqipërisë me Bashkimin Europian, detyra kryesore e opozitës shqiptare është të largojë Edi Ramën nga posti i kryeministrit. “Marrja e pushtetit do të vijë nëpërmjet votës. Pavarësisht se theksohet rruga radikale “protesta, protesta”, ato çfarë bëjnë, godasin. I kemi hequr propagandën kryeministrit, e ka të pamundur plotësisht të vazhdojë të qëndrojë, i ka rënë bazamenti. Mos hapja e negociatave është rrëzim. Një bazament i tronditur plotësisht. Për mua goditja finale është faktori ndërkombëtar, i cili nëse nuk hap negociatat këtë herë, na takon neve ta ngremë në nivel tjetër misionin, sepse ky njeri e çoi pas vendin dhe ne nuk mund ta lejojmë më”, tha Grida Duma./Kliti Topalli
