Ish-kryeministri Sali Berisha ka vendosur të marrë masa për të përballur betejën me Shtetet e Bashkuara të Amerikës dhe kreun demokrat, Lulzim Basha.
Prej disa ditësh ish-kryeministri ka nisur takimet e Foltores për një PD më të fortë dhe të bashkuar ku ka qenë i pranishëm në Tiranë, Fier dhe së fundmi në qytetin e Vlorës. Gazeta ka mësuar se Berisha ka pajtuar 3 këshilltarë të huaj për të organizuar takimet dhe strategjinë që do të përdoret në to si dhe sjelljen e tij në media.
Po ashtu ata do të jenë pranë Berishës për ta konsultuar sa i takon betejës së tij me SHBA dhe gjyqin ndaj sekretarit të DASH.
Berisha vijon kërcënimet ndaj Bashës
Nga ana tjetër Berisha nuk ka kursyer kërcënimet ndaj kryedemokratit Basha. Gjatë Foltores në Vlorë ai u shpreh se Basha është një lider i thyer pasi nuk u dilet në pritë bashkëpunëtorëve. Sipas ish-kryeministrit, nuk mund të ekzekutosh dikë politikisht vetëm se të pëlqen, por duhet ta thuash e më pas ta heqësh. “I kisha thënë atij se ti je lider i thyer, me aktet që ti ke kryer në aktet që ti ke kryer në zgjedhjet e 2017, ti nuk do bëhesh lider. Provoje unë do të bëjë gjithçka, por je i thyer, se nuk u dilet në pritë bashkëpunëtorëve.
I ekzekuton politikisht se nuk të pëlqen ty. Po të jesh burrë u thua, do t’u heq, por dhe ato nuk bëhen”, tha Berisha. Ish-kryeministri tha se Basha nuk mund të jetë kurrë një lider pasi ka mbajtur një qëndrim plotësisht indiferent ndaj trashëgimisë së PD. Sipas Berishës, Basha ka ditur vetëm të largojë njerëz nga partia duke mos sjellë aspak të rinj.
“Pse nuk u bë lider Basha? Nuk u bë lider sepse ia humbi partisë konturet, partia është parti e të drejtave të njeriut. Ne kemi një trashëgimi i PD, trashëgimia jonë janë intelektualët, ish-të burgosurit, të përndjekurit. U dëgjuan kund ata këto 8 vite? Askund. Asnjë qëndrim totalisht indiferent. Në 8 vite, ky që erdhi i ri në krye të PD-së vetëm largoi masivisht dhe nuk tregon dot me gishtërinjtë e një dore të rinjtë që solli në PD.
Ne jemi parti e interesit kombëtare dhe e djathta është parti e patriotëve. Nuk mund të jetë i djathtë ai që nuk është patriot”, u shpreh ai. Po ashtu Berisha u ndal edhe tek zgjedhjet e 25 prillit për të cilat u shpreh se Basha pas humbjes duhet të kishte dhënë dorëheqjen jo të fliste për masakër elektorale. Ai tha se kryeministri Edi Rama vetëm ka vjedhur vota, por sipas Berishës, Basha duhet të denonconte jo të mbante karrigen.“Mendova se do na çonte në këtë fitore, por përkundrazi.
Synonte me çdo kush të krijonte liderin, por lideri nuk krijohet në zemrat tuaj nuk bëhesh kurrë lider. Dhe ku përfunduan? Me datën 25 prill, vetëm 19% demokratëve kishin votuar për ish-Kryetarin e partisë Lulzim Basha. Basha në vend të dorëheqjes , doli në konferencë shtypi dhe tha se është një masakër elektorale. Edi Rama vodhi vota, dyfishin e 2017. Në vend që të merrej me to e të bënte avokatinë, të denonconte patronazhistë. U mor me karrigen e tij sepse kishte frikë”, tha ai.
