Sali Berisha ka ngritur një grup të strukturuar kriminal për të pushtuar me dhunë dhe shantazh çdo cep të Partisë Demokratike. Pasi rrëzoi me presione dyert e blinduara të selisë blu të vendosura me “autorizim” nga amerikanët, Berisha tani ka filluar terrorin me grupin parlamentar, përfshirë deputetë dhe të gjithë mbështetësit e Lulzim Bashës, duke i dhënë imazhin e selisë së PD një godinë, që mbrohet nga bandat e tij dhe ku thuren plane e intriga kundër SHBA-së.
Me zhvillimet e fundit në PD, ikja e Lulizim Bashës, nuk e mori me vete tensionin dhe konfliktin brenda llojit, gjë që tregoi se problemi i Berishës nuk ishte Basha.
Ish-kryeministri po tenton të “eliminojë” çdo zë kundër ardhjes së tij në krye të Partisë Demokratike, edhe pse Shtetet e Bashkuara deklaruan qartë se nuk do të bashkëpunojnë me një parti që drejtohet nga një person “Non Grata”.
Berisha ka marrë rolin e kryetarit, megjithëse nuk është ligjërisht në krye të PD-së, e madje as pjesë e grupit parlamentar, pasi u përjashtua, sepse u shpall ‘Non Grata’ nga Departamenti Amerikan i Shtetit (DASH).
Berisha kërcënon mbështetësit e Bashës në PD dhe kryetarin Alibeaj
Sali Berisha kërcënoi hapur kryetarin e komanduar të PD-së Enkelejd Alibeajn për një realitet të ri, madje i kujtoi atij se karrigia e kryetarit të grupit mund të jetë vetëm edhe për pak ditë. “Enkelejd është kryetar i grupit derisa të qartësohen të gjitha problemet”, tha Berisha.
Por presioni u fortë që po ushtrohet nga Berisha dhe njerëzit e tij, u konfirmua dhe nga deputeti Gazment Bardhi. Ai u shpreh se edhe pse Berisha me Komisionin e Rithemelimit kanë marrë edhe ‘de facto’ selinë e PD-së, krahas asaj ‘de jure’ përmes një vendimi të gjyqtarit Agron Zhukri, Bardhi tha se Berisha nuk mund të imponohet me pjesëmarrjen në grup.
“Një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike. Askush nuk duhet t’i imponohet apo injorojë mendimin e Grupit Parlamentar, kjo është përdhosje e dinjitetit të çdo deputeti”, tha Bardhi.
Njerëzit e Berishës kërcënojnë drejtuesit e zyrës së medias
Për të pasur situatën nën kontroll në të gjithë hapësirën e PD, Berisha, lëvizjen e parë publike e bëri teksa shkriu Departamentin e Marrëdhënieve me Mediat në PD.
Ai jo vetëm i largoi të gjithë nga puna, por edhe e “pushtoi” duke marrë nën administrim rrjetet sociale të kësaj partie, ku postimin e parë që bëri stafi i ri i vënë prej tij ishin artikujt e deklaratat kundër shefit të diplomacisë amerikane, Antony Blinken.
Lëvizje, që tregoi hapur se Partia Demokratike do të përdoret si mburojë në luftën kundër amerikanëve. Mirëpo jo vetëm kaq, në prapaskenë , sulmi i parë i Berishës ka ndodhur me ish- këshilltaren e Lulzim Bashës, Desada Metaj, e cila është raportuar se është kërcënuar nga persona të afërt me ish-kryeministrin Sali Berisha.
Po ashtu Silvi Bardhi, një nga administratoret e grupit, e cila ka qenë edhe zëdhënëse e Sali Berishës gjatë kohës që ky i fundit ka qenë kryeministër i Shqipërisë në vitet 2005-2013, ka hequr të gjithë “të besuarit” e Bashës, sikundër janë deputetët Ina Zhupa dhe Gazment Bardhi.
Po ashtu nga “fshesa” që pati në dorë zëdhënësja për shtyp, Silvi Bardhi janë kapur edhe gazetarët dhe këshilltarë të ish-kryedemokratit Lulzim Basha, janë përfshirë edhe Patrik Sadikaj dhe Desada Metaj, e po ashtu edhe fotografë që kanë shoqëruar ish-numrin një të PD-së nëpër takimet e tij. Ndërkohë mësohet se njerëzit e Berishës kanë kërcënuar edhe ish-stafin e Lulzim Bashës që ka punuar në selinë e PD, një pjesë e së cilëve janë pushuar nga puna dhe një pjesë vijojnë ende punë në godinën blu. Megjithatë, mbetet të shihet në ditët në vijim se çfarë do të ndodhë më konkretisht.
