Ju, me siguri e kujtoni të gjithë historinë kur Besi dhe Xhensila u takuan për herë të parë te Zogu i Zi. Ajo, shumë e bukur, i doli para atij… Ishte bashkë me të ëmën, aty diçka ndodhi, një bisedë e shpejtë e dy të rinjve, një kompliment i Besit për yllin që sapo kishte takuar (edhe pse e njihte pak nga ekrani)… dhe vazhdimin e njihni mirë.
Por ajo që nuk e paskemi ditur asnjëri nga ne qenka një fakt tjetër. Ai që e nxori Besin nga shtëpia atë ditë paska qenë Nard Ndoka.
Po, politikanit të njohur shqiptar, jo vetëm për qetësinë dhe profilin elegant politik, por edhe për shumë prej batutave që janë bërë virale (edhe pse ai nuk ka thënë asnjërën), Besi i paska borxh një nuse.
Sot, Nard Ndoka ishte i ftuar te BE Caffee, me Erionin dhe Besin. Pas një bisede me pyetje pikante për politikën dhe jashtë saj, në fund Besi tha se nismëtari që ai sot ka familjen e tij është pikërisht Nardi.
Nuk e kishte thënë asnjëherë më parë, po kështu kishte ndodhur: “Sebepi që sot unë jam i martuar dhe kam familjen time është Nard Ndoka. Ai më nxori nga shtëpia atë ditë kur takova Xhensilën për herë të parë.
Më mori në telefon dhe më tha: “Kam një rrugë për në Fushë-Krujë, do vish?” “Po”, – i thashë unë dhe, aty, kur zbrita te Zogu i Zi, takova Xhensilën”, – tregoi Besi.
Duke e vazhduar me humor bisedën, edhe pas një thashethemi të fundit që është përhapur virtualisht për një dasmë të dytë të mundshme të Nardit, Besi i premtoi: “Ja ku po ta them publikisht, të kam një nuse borxh.
Po u martove për herë të dytë, do të të sjell unë….” Me humorin karakteristik dhe me batutat që qarkullojnë prej kohësh tashmë në emër të tij, Nardi tha se disa prej tyre i pëlqen, edhe pse nuk është ai që i thotë: “Mendo pozitivisht” edhe mua më ka pëlqyer edhe pse nuk e kam thënë unë, edhe “gjërat pozitive janë më të mira se gjërat negative”…/Revista Class/
