Zbardhen provat që vërtetojnë se prokurori Bujar Sheshi, është ai i cili gozhdoi Ilir Metën dhe avokatët e tij për aferën 700 mijë eurosh në videon me Dritan Priftin. Gazeta tregoi një ditë më parë se e gjithë lufta për shkarkimin e Sheshit nga Këshilli i Lartë i Prokurorisë është lojë e presidentit. Autoriteti për Hapjen e Dosjeve e akuzoi atë për lidhje me Sigurimin e Shtetit, por gjykata dhe prokuroria e rrëzuan, duke dështuar planin Meta-Sula.
Gentiana Sula dhe presidenti kanë miqësi të vjetra mes tyre dhe sipas burimeve të sigurta të gazetës, kjo ka qenë e gjitha strategji e Metës. Gazeta po tregon sot prova të tjera në këtë aspekt. Sheshi është prokuroi i cili mbrojti deri në fund idenë se Meta duhej të dënohej me 2 vite burg për videon me Priftin. Madje ai paraqiti me dhjetra prova, të cilat gjykata i anashkaloi, duke shpallur të pafajshëm presidentin aktual.
“Nga ana e prokurorëve u parashtrua se në përfundim të shqyrtimit gjyqësor të çështjes, rezultoi e provuar që në datën 1 mars të vitit 2010, rreth orës 13:00, në zyrën e Dritan Priftit ka shkuar i pandehuri Ilir Meta, i cili në atë kohë mbante funksionet e Zëvendëskryeministrit dhe të ministrit të Punëve të Jashtme dhe gjatë bisedës së zhvilluar, ky i fundit i ka propozuar të favorizojë në garën koncesionare që zhvillohej për ndërtimin e hidrocentraleve Egnatia-Shushicë, Bashkimin e Përkohshëm të Shoqërive “Vëllezërit Tola” sh.p.k., për një investim me një vlerë rreth 65 milion euro, duke i premtuar si shpërblim të kundërligjshëm shumën prej 700 mijë euro dhe 7% të aksioneve, si dhe ndërhyrjen për të favorizuar Shoqërinë “Halilaj Holding Group” sh.a. në ankandin për “Shitje të një sasie prej 30 mijë ton naftë bruto” të prodhuar nga Shoqëria “Albpetrol” sh.a. Për këtë të fundit, sipas dëshmitarit, nga i pandehuri Ilir Meta i është ofruar një përfitim i paligjshëm deri në 1.000.000 (një milion) dollarë që do të ndaheshin mes tyre”, thuhet në vendimin e Gjykatës së Lartë, ku tregohet qartë qëndrimi i prokurorit Sheshi, i cili asistohej dhe nga prokurorja Anila Leka.
Qëndrimet e prokurorit
Më tej, në argumentet e Bujar Sheshit, bëhet me dije se në datën 13.01.2011, në Prokurorinë e Rrethit Gjyqësor Tiranë është paraqitur me vullnetin e tij shtetasi Dritan Prifti, i cili me cilësinë e personit që tregon rrethana të dobishme për qëllime të hetimit, ka sqaruar se regjistrimi audioviziv i materialit të transmetuar në emisionin “Fiks Fare” të televizionit “Top Channel” ishte realizuar prej tij dhe ka shpjeguar faktet dhe rrethanat që e çuan në realizimin e këtij regjistrimi. “Krahas dëshmisë së shtetasit Dritan Prifti, si provë që vërteton faktin e zhvillimit të bisedës, prokurorët kanë referuar analizën e tabulateve telefonikë, sipas të cilave, në datën 01.03.2010 në orën 10:59 dhe 13:16, i pandehuri Ilir Meta i ka telefonuar dëshmitarit Dritan Prifti. Po kështu edhe të dhënat e sistemit TIMS që konfirmojnë faktin e largimit të së pandehurit jashtë shtetit në të njëjtën ditë në orën 13.57”, thuhet më tej në vendim, duke treguar provat që ka mbledhur prokurori Sheshi.
Autenticiteti i videos
Në atë kohë, edhe sot, Meta shprehet se videoja e publikuar nga Dritan Prifti është e montuar. Edhe pse aty kemi dy individë me zë e figurë që flasin për 700 mijë euro, gjykata nuk e mori parasysh. Por prokurori i çështjes, pra Bujar Sheshi, është shprehur i bindur se videoja ishte origjinale. “Nga ana tjetër prokurorët konkludojnë se është provuar që regjistrimi audio-viziv është kryer nga shtetasi Dritan Prifti me anë të një pajisje të kamufluar joprofesionale si një orë tavoline, duke e shkarkuar menjëherë në laptopin e tij personal, sapo ka ndërprerë regjistrimin, pasi i pandehuri Ilir Meta është larguar nga zyra e tij.
Sipas prokurorëve, origjinali i këtij regjistrimi audio video ndodhet në laptop dhe USB, të pranuara nga gjykata si provë materiale, në një “file” të emërtuar “C:User Dritan Prifti/PICT 0008.avi”. Ky regjistrim është vlerësuar nga gjykata si provë e vlefshme proceduralisht, me vendimin e ndërmjetëm të datës 11.07.2011, me të cilin ajo ka rrëzuar kërkesën e mbrojtjes për papërdorshmëri të video regjistrimit”, thuhet në vendim. Më tej theksohet se sipas prokurorëve, nga tërësia e rrethanave të çështjes, të vërtetuara në rrugë gjyqësore, por dhe nga përmbajtja e aktit të ekspertimit teknik, rezultoi se regjistrimi audio-viziv i bisedës Meta-Prifti ishte origjinal dhe i patjetërsuar. Pra, Bujar Seshi është ai i cili ka hedhur poshtë të gjitha pretendimet se videoja ishte e montuar.
Tabulatet telefonike
Ndonëse Meta këmbëngulte në atë kohë se gjithçka ishte trillim, prokuroria ka pasur disa tabulate telefonike që vërtetonin të kundërtën. Por edhe në këtë rast gjyqtarët mbyllën sytë. “Ndonëse në dëshminë e tij, të dhënë para gjykatës më datën 21.11.2011, shtetasi Bekim Halili tha se ai ka biseduar me Ilir Metën për problemin e ankandit vetëm në muajin qershor 2010, pra nuk pranon interesimin e tij të vazhdueshëm për të fituar ankandin, dëshmia e tij është e pabesueshme. Ai u shpreh se nuk kishte pasur komunikime telefonike të shpeshta me Ilir Metën, duke pretenduar se mik kishte vetë Dritan Priftin. Analiza e tabulateve telefonike të numrit celular të përdorur nga ky shtetas tregon të kundërtën. Me Dritan Priftin ai ka biseduar për periudhën nga data 01.02.2010 deri më 01.02.2011 gjithsej 13 herë, ndërsa me të pandehurin Ilir Meta ai ka pasur gjatë po kësaj periudhe 192 telekomunikime. Vetëm në ditët që është shtyrë dhe do të zhvillohej ankandi ai ka biseduar 3 herë më datën 26.2.2010 dhe 12 herë më datën 10.3.2010, madje edhe pas mesnate”, ka theksuar prokuroria. Të gjitha këto tregojnë se shkarkimi i Sheshit ka qenë lëvizje e Metës. /Kliti Topalli
