Kryeministri Edi Rama ka paralajmëruar masa të reja në zonën e Kombinatit në Tiranë. Përmes një postimi në rrjetin social Facebook, shefi i qeverisë deklaroi se nga dita e hënë do të merren masa të reja në këtë zonë, duke e blinduar totalisht atë.
Sipas Ramës, në tregun e Kombinatit do të dalë ushtria në rrugë dhe nuk do të lejoj asnjë makinë të kalojë, duke shtuar se do të ketë vetëm një hyrje në të vilën do të krijohet një tunel higjenik për dezinfektim. Po ashtu, një tjetër masë do te jetë edhe distanca e qytetarëve 2 metra larg nga njëri-tjetri.
“Kombinat, Tiranë – nuk do rrezikojmë gjithçka që kemi arritur deri tani në Tiranë vetëm për një treg! Nëse nga 27 njësi, në 26 prej tyre tregjet funksionojnë për bukuri, nuk ka asnjë arsye që të mos vendoset rregull edhe në tregun e kombinatit. Nga e hëna rregulla të reja: Ushtria nuk do të lejojë më makina në treg; Do të ketë vetëm një hyrje, çdo hyrje tjetër mbyllet; Largohen të gjithë ambulatët në një hapësirë tjetër; Në hyrje do të krijohet një tunel higjenik për dezinfektim. Do vendoset sinjalistikë 2m larg njëri-tjetrit. Masa drastike për të vetmin treg që na sjell probleme, por të gjitha këto nuk bëhen pa bashkëpunim”, tha Rama.
