Vendimi i Presidentit Ilir Meta për të mos dhënë autorizim për hapjen e negociatave me Greqinë ka shkaktuar reagime të shumta në Athinë. Lajmi ka bërë jehonë në të gjitha mediat greke, të cilat kanë shpërthyer në kritika ndaj kreut të shtetit. Me dhjetëra portale dhe gazeta janë shprehur se Meta me veprimin e djeshëm i vuri zjarrin marrëdhënieve mes dy vendeve.
“Zjarrin në marrëdhëniet greko-shqiptare e vë Ilir Meta! Presidenti shqiptar refuzoi sot të autorizojë bisedime të mëtejshme me Greqinë mbi kufijtë detarë, duke kërkuar më shumë informacion rreth asaj se si po negocion qeveria”, janë shprehur një sërë portalesh si “To Vima”, “Neësit.gr”, etj.
Në të njëjtën linjë kanë qenë dhe një sërë mediash të tjera, ku kanë bërë një historik të asaj çfarë ka ndodhur këto muaj. Portali “Eleftherostypos” ka shkruar se teksa pritej vizita e Tsipras në Tiranë, Meta ka bllokuar diskutimet.
“Në pritje të vizitës së kryeministrit Alexis Tsipras në Tiranë, ku do të konfirmohet marrëveshja, Presidenti Ilir Meta nuk ka dhënë autorizimin për të përfunduar një marrëveshje, siç kërkohet nga Kushtetuta, duke deklaruar se pa të, marrëveshja do të anulohet. Sipas Presidentit, mungesa e autorizimit bazohet te vendimi i Gjykatës Kushtetuese, e cila në vitin 2009 rrëzoi marrëveshjen që u nënshkrua nga Berisha, pas një padie nga lideri i opozitës së asaj kohe dhe sot kryeministër, Edi Rama”, shprehet portali.
Dyshimet e medieve greke
Sipas medieve greke, diskutimet mbi zonat detare karakterin nga një fshehtësi ekstreme. Por sipas tyre, deri më tani është fakt se Athina pranoi një rishikim të marrëveshjes së 2009 dhe kërkoi të ketë një marrëveshje të re me qëllim ndryshimin e kufijve. Arsyetimet e Athinës kanë qenë se Tirana u dëmtua nga marrëveshja e parë, raportojnë mediat greke.
“Çështja e dytë është se Greqia po synon të zgjerojë ujërat territoriale deri në 12 milje detare. Sipas qeverisë, një marrëveshje e re është më e mirë sesa një marrëveshje e pazbatueshme. Sipas informacioneve, të konfirmuara dhe nga mediat greke, Athina po teton të kompensojë Tiranën me një zonë detare rreth Korfuzit. Kjo mund të bëhet duke zhvendosur vijën kufitare. Megjithatë asgjë nuk mund të jetë zyrtare derisa të dalin të dhënat mbi harta”, shkruajnë mediat greke.
Sipas tyre, marrëveshja e 2009 bënte të mundur që Athina të zgjerojë ujërat e saj territoriale në 12 milje detare. Nga ana tjetër, mediat përmendin dhe Turqinë, duke thënë se marrëveshja Shqipëri-Greqi mund të sjellë dhe reagimin e saj. Megjithatë mbetet të shihet se çfarë realisht do të ndodhë. Por dje Meta ngriu bisedimet me grekët dhe tani Ministria e Jashtme është duke punuar që të plotësojë kushtet e vendosura nga kreu i shtetit. Shumë shpejt në tryezën e Metës do të jenë emrat e negociatorëve dhe të dhënat e sakta mbi paktin detar. Por lëvizja e kreut të shteti duket se ka shqetësuar dhe Greqinë, pasi marrëveshja me vendin tonë, pritet të përdoret si precedent prej saj./SOT
