Nga Pëllumb Kulla
Nuk besoj se mund të gjendet një vend i dytë në botë si ky i yni. Qëkur kam lindur e deri më sot këtu nuk rreshtin fishekzaret e fitoreve!
Vendi i bekuar! Është kjo hise e rruzullit ku festat nuk kanë fund, se fitoret ndjekin njëra tjetrën.
Zor të gjesh këtu një date, a një ditë pa fitore!
Deri para nja 30 vjetësh fitimtarët fishekzaret, dhe fitoret ishin më të thjeshta, më të qarta e më të kuptueshme, kurse tani jo vetëm që janë shtuar, por edhe fitimtarët janë dyfishuar. Janë palë të kundërta dhe që të dyja në të njëjtën natë festojnë. E zjarri i festës ndrit botën. Aty në kupë të qiellit fishekzaret e të dy palëve i nxjerrin gjuhën njëra tjetrës, pastaj shuhen dhe bien tok, si hi, përmbi kokat e manifestuesve.
Ja, në këtë vend, si në asnjë vend tjetër, zgjedhjet nxjerrin dy palë fitimtarë. Njëra palë feston fitoren në tryezën e qeverisë, tjetra në bulevard. Njëra ka marrë pushtetin dhe nis qeverisjen, tjetra feston suksesin që shumica e popullit ka votuar për të, por për fat të keq nuk qeveris se pala tjetër i ka vjedhur votat.
Ky avaz në të tëra zgjedhjet, në të tëra garat në të tëra ndeshjet. Një fjalë me vend mund ta thoshte arbitrimi, por arbitrimin ne e urrejmë sa hërë nuk flet për ne.
Në festivalet e këngës bashkë me fituesen, fitojnë dhe festojnë të gjithë këngët e tjera, të cilave u është ngrënë haku.
Në futboll po piqet ideja që arbitrat nuk duhen hiç, se deri tani arbitrat kanë dalë nga stadiumet të fashuar nga koka tek këmbët, kurse ekipet kanë lënë fushat të bindur se kanë fituar pavarësisht nga rezultati. Rezultati është gjëja më e parëndësishme në Shqipëri! Arbitrat le të gëlltitin bilbilat dhe le të gjejnë vend tjetër të shkojnë e të hanë dru!
Po bëhen tre muaj, që cdo datë gjashtëmbëdhjetë të çdo muaji, unë e përfytyroj Edi Ramën duke dalë nga Lana, ku pasi e heqin zvarrë e hedhin Luli me Monikën, duke mbyllur veshët kundërshtimeve të sinqerta të Presidentit, që gjithmonë fton për qetësi dhe dashuri. Por respektit të thellë për të, ata i nxjerrin ballë premtimet që i kanë bërë turmës, që i ndjek dhe sa më shumë ajo firon, aq më shumë brohoret.
Edhe festa e djeshme fitore ishte. Lajmin e rrëzimit të kryeministrit, Basha provoi ta jepte edhe njëherë natën se ditën e pat dhënë disa herë. Por edhe protesta e mbrëmshme nuk kish si të mos përfundonte me fitoren e radhës.
“Populli sot firmosi largimin e Ramës. Rama nuk është më,” njoftoi me zërin e ngjirur triumfator i pari i protestuesve, ”Sot Rama është i rrëzuar!”
Dhe e gjithë turma e udhëtarëve të lodhur, mbledhur nga ana e anës, brohoriti me lotë gëzimi në sy nga ky lajm i shumëpritur, edhe pse që të gjithë e dinin që nuk ishte hiç i vërtetë.
Por fjala të flakëron shpirtin. Dhe fishekzaret mblodhën edhe një herë forcat, u ngritën dhe ndritën llaps qiellin e Tiranës.
