Banka e Shqipërisë pas një ngadalësimi në 2019-n, parashikon rritjen ekonomike të përshpejtohet në afatin e mesëm,. Ekspertët e saj kanë prezantuar ditën e djeshme, raportin e Politikës Monetare të tremujorit të katërt 2019.
Paga mesatare mujore bruto për një të punësuar, në vend u rrit me 4.5% në tremujorin e dytë. Kjo rritje rezultoi lehtësisht më e ngadaltë se rritja me 4.9% e një tremujori më parë. E deflatuar me inflacionin vjetor, rritja e pagës mesatare ishte 3.1%, nga 3.3% në tremujorin e mëparshëm.
Ecuria e pagës mesatare në ekonomi vlerësohet të jetë mbështetur edhe nga rritja e nivelit të pagës minimale në vend dhe pagave të sektorit publik për kategori të caktuara.
Megjithatë, dinamika rritëse e pagës mesatare sipas sektorëve mbetet lehtësisht më e shpejtë në sektorin privat krahasuar me atë shtetëror.Paga mesatare mujore në sektorin privat ishte më e lartë se niveli i shënuar të njëjtën periudhë një vit më parë, me 4.9% në terma nominalë dhe me 3.5% në terma realë.
Ndërkohë, në sektorin shtetëror, ky tregues u rrit me 4.3% në terma nominalë vjetorë dhe 2.9% në terma realë. Rritja e pagës sipas aktiviteteve ekonomike vlerësohet të jetë ndikuar në masën më të madhe nga ecuria pozitive
e pagave në sektorin e shërbimeve. Ky tregues i referohet pagës mesatare mujore bruto që merr një i punësuar dhe ka si burim të dhënat e listë-pagesave të subjekteve nga Drejtoria e Përgjithshme e Tatimeve.
Kjo pagë përbëhet nga paga bazë për punën e kryer, shtesat mbi pagë për funksione drejtuese, shtesa mbi pagë për vjetërsi pune, shtesa mbi pagë për vështirësi pune, shtesa të tjera të lidhura me tituj, grada, si edhe shpërblimet. Në të përfshihen të gjitha aktivitetet ekonomike, si në sektorin shtetëror, ashtu edhe në atë privat, për të gjithë të punësuarit me pagë që punojnë në vend, duke përfshirë edhe rezidentët e huaj.
Paga bazë minimale mujore për punonjësit në shkallë vendi u rrit nga 24,000 lekë në 26,000 lekë në tremujorin e parë të vitit 2019. Kjo rritje në terma nominalë vjetorë është 8.3%.
Sipas të dhënave të INSTAT-it, në tremujorin e dytë të këtij viti, rreth 28% e të punësuarve kontribuues marrin një pagë deri në nivelin e pagës minimale zyrtare.
Ndër vendimet e tjera të qeverisë lidhur me pagat e sektorit publik është edhe rritja e tyre për kategori të caktuara, vendime që kanë hyrë në fuqi në tremujorin e dytë të vitit 2019 dhe që vlerësohet të kenë ndikuar në kahun rritës të ecurisë së pagës mesatare mujore në ekonomi.
