Rikthehet Bujar Leskaj në krye të Kontrollit të Lartë të Shtetit. Mësohet se Leskaj do të vazhdojë të jetë në krye të KLSH-së deri në momentin kur do të zëvendësohet nga një drejtues i ri.
Në një njoftim të firmosur nga ai, thuhet se zv. kryetarja e KLSH-së, Lindita Lati Milo, është tërhequr nga ushtrimi i kompetencave të kryetarit për arsye personale.
“Pas kërkesës për tërheqje nga kompetencat e deleguara të zv. Kryetares, znj. Lindita Milo për arsye personale, dt. 21.05.2019, nr. 347, dhe garantimit te vijueshmërisë normale të punës;
Në kushtet e zgjatjes në kohë të nominimit dhe përzgjedhjes së Kryetarit të ri të KLSH-së, sipas përcaktimeve të Ligjit 154/2014.
VENDOSA:
1. Shfuqizimin e kompetencave të deleguara me vendimin e Kryetarit nr. 244, datë 12.12.2018 zv/Kryetarit të KLSH-së znj. Lindita Lati (Milo).
2. Ky vendim do i përcillet Presidentit të Republikës, Kryetarit të Kuvendit, Kryetarit të opozitës.
3. Vendimi hyn në fuqi pas botimit në fletoren zyrtare’, thuhet në vendimin e kreut të KLSH.
Kujtojmë se pas përfundimit të mandatit të Leskajt në janar të këtij viti, kompetencat e kryetarit i kaluan zëvendëses së tij Lindita Lati Milos.
Ndërkohë dy kandidaturat e presidentit Ilir Meta për Vitore Tushën dhe Bahri Shaqirin u rrëzuan nga mazhoranca me pretendimet se u mungonte eksperienca në fushën financiare.
