Si futbollist pati një karrierë të madhe. Shumë suksese me Romën, por mbi të gjitha me fanellën e Milanit. Megjithatë, si trajner, Carlo Ancelotti u bë një nga më të mirët në botë, me të drejtë. I lindur në klubin e futbollit Reggiolo, ai luajti për Parmën nga ’75 deri në ’79. Më vonë u ble nga Roma, ku qëndroi deri në vitin 1987, kur erdhi telefonata nga Milani.
Luajti me kuqezinjtë deri më 1992, vit në të cilin “i vari këpucët në gozhdë”. Nga ’92 u bë zëvendës i Arrigo Sacchi në pankinën e Italisë, në vitet ’95 -’96 eksperienca e tij e parë si trajner në një klub me Reggianan. Nga ’96 deri në ’98 udhëhoqi Parmën duke arritur vendin e dytë në kampionat dhe Champions League. Rezultatet e shkëlqyera e bindën Juventusin të vinte bast për të.
Ai qëndroi në Torino për dy vite, por ndjenja me mjedisin bardhezi nuk arriti në nivelet e dëshiruara. Në vitin 2001 kaloi te Milani. Tetë vitet si trajner kuqezi u karakterizuan nga triumfe të mëdha, në Itali, por mbi të gjitha në Evropë.
Nga viti 2009 deri më 2011 drejtoi Chelsean, më pas një vit te PSG, dy të tjera te Real Madridi, kohë kur arriti të sjellë “Decima” (të dhjetën) historike në Valdebebas. Më pas Bayern Munich, klubi që asokohe e shkarkoi në tetor 2017. Palmarèsi i tij është thjesht i jashtëzakonshëm.
Si lojtar ai fitoi 4 Kupa Italiane, 3 tituj, një Superkupë Italiane, 2 Kupa Evropiane, 2 Superkupa UEFA dhe 2 Kupa Ndërkontinentale. Si trajner, siç u përmend, ai bëri edhe më mirë: një titull, një Kupë Italiane, një Superkupë Italiane, një titull në Premier League, një “FA Cup”, një titull në Ligue 1, një kupë spanjolle, një superkupë gjermane, kampionati gjerman, një Kupë Intertoto, tre Champions League, tri Superkupa të Europës dhe dy Botërorë për Klube.
Lajmi i verës 2018, që i mahniti të gjithë: mori drejtimin e Napolin. Por 18 muajt me blutë e Serie A nuk lanë kujtime të pashlyeshme. Më pas lamtumira dhe nënshkrimi me Evertonin, që e çoi në vendin e dhjetë të Premier League.
Pastaj, sërish thirrja e zemrës: ja ku është Real Madridi, me pushtimin e të 14-tit Champions League. Sot “Carletto” mbush 63 vjeç. Një trajner super i kompletuar, një babaxhan për lojtarët, një “libër” për t’u shfletuar nga të gjithë që synojnë suksesin e tij në futboll./Noa.al/
