Duhej plasur skandali i tregut si të zarzavateve, frutikulturës, por dhe bulmetit dhe mishit! Një pjesë e fermerëve shqiptarë, kultivuesve dhe prodhuesve të perimeve dhe frutave, por dhe ato të rritjes së bagëtive, importuesve të mishit, prodhuesve të djathit dhe bulmetit, vajit, etj., etj., po bëhen akoma më të rrezikshëm se sa kultivuesit e kanabisit! Në fakt, kanabis sativën nuk e ka prodhuar njeriu, as e ka shpikur ai! Kanabis sativa është më e lashtë se sa qenie njerëzore! Pra është prodhim i natyrës dhe jo i njeriut!
Atë e kanë ndaluar sigurisht, pse njeriu përveç përdorimeve të mrekullueshme në shekuj, sot e kërkon për ta përdorur për efektin drogë! Por, kanabis është një bimë e çmuar për shumë e shumë efekte të jashtëzakonshme në mjeksi dhe modë! Por çfarë po bëjnë kultivuesit e perimeve dhe zarzavateve në përgjithësi dhe padyshim dhe ato të frutave! Asgjë më shumë se sa “vrasjen e lehtë dhe nganjëherë të shpejtë të konsumatorëve të tyre”!
Për shkak të fitimeve, garës idiote dhe kriminale për të marrë sa më shumë prodhim me anën e shpejtimit dhe shtimit të rezultatit sasior, përdorin jo vetëm hormone, kimikate vrastare e metoda të pa ligjshme por kanë dëmtuar traditën kombëtare, kanë dëmtuar imazhin dhe kanë shkatërruar llojet e jashtëzakonshme “bio” tonat!
Dje në kohën e diktaturës i kishim prodhimet bio dhe regjimi na i ndaloi ti hanim ne dhe jua jepte austriakëve dhe francezëve, sot ne vetes i japim domate, qepë, kastraveca, kunguj, mollë, portokalle, gjithçka të përpunuar gjenetikisht, kimikisht dhe të degraduar me hormone vrastare! Nuk mund të ketë më shoqëri “auto kriminele”, një shoqëri që nuk ndalet përpara çdo krimi ushqimor për tu pasuruar!
Nuk mund të ketë më fermer injorant dhe dembel, por dhe më të pashpirt dhe po ashtu dhe blegtor më të paskrupullt se sa ai shqiptar! Sigurisht jo të gjithë! Sepse ne nuk jua hedhim austriakëve dhe francezëve sot, ne ja hedhim vetes! Prodhimet me hormone dhe të përpunuara në mënyrë absurde gjenetikisht ja japim vetes!
Po ti shtosh dhe mungesën e shtetit apo shtetin e dobët dhe fakir, shtetin që me punonjësit e tij merr lekë dhe mbyll sytë, që nuk ka laboratore dhe nuk ka fonde, do të thotë se ne ushqehemi me helme dhe vdesin prej tyre! Po kjo është akoma më keq se sa “kanabizimi”!? Hashashi absolutisht nuk është më i keq se sa krimi me hormone dhe helme kimikate në ushqim! Nuk lamë miell me rrezatim dhe të qelbur nga Ukraina dhe Serbia, pastaj mish të hormonizuar nga Brazili, pastaj vaj palme të shkrirë në gjalpë dhe vaj, që vjen nga Malajzia, por kemi dhe domatet e qelbura të fushave të zonave dikur krenari kombëtare për bujqësi si Berati dhe Lushnja!
Për turp dhe faqe e zezë shiten dhe në internet, hormone dhe fara të përpunuara gjenetikisht, për prodhim të rrejshëm dhe kriminal! Nuk ka asnjë shans që të mos hash diçka që është prodhuar me këto mënyra! Shqiptari po vdes shqiptarin dhe pastaj del në TV dhe thotë: unë për vete nuk e ha këtë e sigurisht e shet për shqiptarin tjetër! Po a ka më krim se sa ky? Mirëpo nuk ka ministri, nuk ka polici, nuk ka prokurori, nuk ka politikë që merret me të tilla probleme, sepse opozita merret me krimin e vet politik, me të ndenjurat e saj, që nuk i ka në qeveri!
Njerëzit duhet të japin jetën për ardhjen e Lulzimit dhe Monikës në qeveri ndërkohë që lejohen të vrasin veten me hormone dhe plehra kimike dhe gjenetike për të fituar sa më shumë në kurriz të jetës së tyre ! Në kurriz të fëmijëve! Gati-gati, kemi qenë më mirë në kohë të kriminelit Enver që na mbante barkun bosh, se sa të kriminelëve shqiptarë fermerë dhe shtet e pushtet bashkë, pa dallim pozitë e opozitë, të cilët vrasin çdo ditë me të tilla marrëzi! Nuk mund të ketë më njerëz imoralë, kriminelë dhe batakçinj, se fermerët dhe blegtorët e këtij tarikati!
Sepse ato sabotojnë dhe ju prishin punë dhe fermerëve dhe blegtorëve të ndershëm, që nuk duan të vrasin njerëz! Ankohen pastaj nga shteti dhe për banalitete të dukshme, kur ky shtet i ka lejuar të bëjnë krim ndaj qytetarëve të tij! Në vend që t’i fuste në burg si “vrasës me paramendim”! Dënimet për të tilla vepra janë të rënda si në Europë dhe USA! Fermerët që nuk ndalen përpara asgjëje për hatër të fitimit futen në burg dhe kanë gjoba të jashtëzakonshme! Padyshim, sepse bota e kulturuar ka rreptësi të madhe në këtë drejtim! Në Shqipëri, pushtetet prej tre dekadash kanë lejuar prishjen e farës shqiptare, kanë dëmtuar “brand-e” të mëdha shqiptare! Kanë shkatërruar duhanin dhe industrinë e tij në mënyrë kriminale, duke u përdorur nga markat e mëdha (që nuk lejojnë ato tradicionale) dhe shkatërruar prodhimin vendas e të gjitha qeveritë kanë rënë dakord!
Po kështu po diskreditohen për perime dhe fruta të prodhimit gjenetik fals dhe kriminal që pastaj prodhimet maqedonase, greke dhe italiane të kenë përparësi! Po goditet bujqësia shqiptare në cilësinë e saj dhe sinqeritetin apo ndershmërinë e prodhimeve! Po bëhet me qëllim dhe ka plot fermerë që qorrazi po i binden kësaj farse idiote dhe dëmprurëse në ekonominë tonë kombëtare. Nuk mund të ketë më turp se sa kaq. Mirëpo lejohet ky degradim dhe kjo marrëzi kolektive e jona! Ju lejohet injorantëve të “fitojnë faqen e zezë të tyre” dhe batakçinjve që të përdoren nga aferat me prodhimet maqedonase dhe greke kryesisht!
Po pra, sepse maqedonasit dhe grekët “përdorin 20% hormone kurse shqiptarët 80% hormon”! Si nuk na bie pika si shoqëri kur dëgjojmë të tilla marrëzi dhe provojmë të tilla krime ushqimore! Nga “gjenocidi ushqimor i Enverit dolëm në gjenocidin kimik dhe hormanal të demokracisë”!?
Po helmojmë fëmijët dhe po dalim të sëmurë! E në fund, themi pse ikin njerëzit nga Shqipëria!? Po ku ka më arsye të “mirë se sa kjo”!? Po shumë më të qartë dhe më të kuptuar mirë, se sa “kanabizimi” dhe kultivimi i tij në Shqipëri! Akoma më krim se pikërisht kultivimi i bimës që me ligj është nxjerrë jashtë ligjit, duke qenë diçka që nuk ka lindur as nga njeriu dhe as nga ligji!
Kurse “domat-izimi” me helme dhe gjenetikë është akoma më keq moralisht dhe padyshim ndershmërisht shumë herë më rëndë! Ato që mbjellin kanabis nuk bëjnë asgjë më keq se sa fermerët e “domateve kriminale” të përpunuara gjenetikisht dhe kimikisht! Absolutisht asgjë më keq! /Nga Besi BEKTESHI
