Aktori i njohur, Laert Vasili, i ftuar në linjë telefonike në studion e gazetares greke Tatiana Stefanidu, u është përgjigjur disa pyetjeve lidhur me vrasjen dhe ceremoninë mortore të Konstandinos Katcifas.
Pas debatit që Vasili pati në një studio televizive shqiptare, ku u duk se u kritikua në një farë forme duke iu thënë se po mbronte palën greke, nga ana tjetër në këtë intervistë ai është përballur me “inatin” e grekëve pasi sipas tyre ai kishte mbajtur anën e shqiptarëve dhe kishte deklaruar se “RENEA veproi mirë”.
Gazetarja e ka pyetur hapur se çfarë mendon për këtë çështje, ndërsa Laerti është munduar që gjatë gjithë fjalës së tij, të qetësojë gjakrat dhe të bëjë thirrje që mes shqiptarëve dhe grekëve të mos ketë ndasi, por të gjejnë pikat e përbashkëta që i bashkojnë.
“Unë kam deklaruar dhe po them se kushdo person që del i armatosur para RENEAS apo policisë dhe i kërcënon ata, atëherë ata e kanë detyrë që ta neutralizojnë, duke i bërë thirrje për t’u dorëzuar, duke tentuar ta arrestojnë por nëse ka shkëmbim zjarri, atëherë ata do përgjigjen po në të njëjtën formë. Mesa di unë RENEA i ka bërë thirrje për t’u dorëzuar Kacifas, por ai ka refuzuar duke gjuajtur me armë në drejtim të tyre, e në këtë moment ai është qëlluar për vdekje nga kundërpërgjigjja e policisë.
Unë nuk mund të them a bëri mirë apo jo RENEA, dhe nuk jam shprehur se “ përgëzoj RENEA-n”, sepse sido të jetë unë nuk mund ta them këtë kur ngjarja përfundon me viktimë, por di që ata i kanë bërë thirrje për t’u dorëzuar, dhe viktima i ka qëlluar me armë, pastaj, pastaj më tej i takon shtetit dhe strukturave përkatëse ta zgjidhin”, është shprehur Laert Vasili.
Nga ana tjetër Vasili është pyetur se ka përgëzuar RENEA-n dhe policinë për gjatë ceremonisë së varrimit, ku edhe pse pati provokime dhe thirrje të rënda antishqiptare, ata nuk ranë pre e provokimeve dhe nuk pati përplasje, shkruan “Panorama”. Ndërkohë ai është pyetur edhe lidhur me reagimin që bëri kryeministri Rama menjëherë pas ngjarjes.
“A ishte një reagim i denjë ai i kryeministrit Rama lidhur me këtë ngjarje?”, ishte pyetja që iu drejtua Vasilit nga studio, të cilën ai ka preferuar të mos i përgjigjet drejtpërsëdrejti, e duke thënë se kjo ngjarje nuk duhet t’i ndajë këta dy popuj, pasi as një grek nuk përfaqëson një shtet të tërë, e as një shqiptar nuk mund të përfaqësojë shtetin tonë.
