Partia Demokratike, partia më e madhe e opozitës, rrezikon të mos regjistrohet për zgjedhjet vendore të 14 majit. Kreu i KQZ-së, Ilirjan Celibashi, paralajmëroi mosregjistrimin e PD-se, në rast se ngërçi i PD-së vijon. Ai u shpreh se duke qenë se duhet patjetër një zgjidhje për këtë çështje dhe jo vetëm nga KQZ-ja.
Vendimi i tij favorizon kreun e “Foltores”, pasi në afatet e KQZ për të vendosur për anëtarët e KZAZ-ve Berisha sipas ligjit duhet të dilte menjëherë jashtë loje. Fakti është shumë i qartë. Vendimi i gjyqtarit Agron Zhukri, i cili “i fali” PD, Berishës, në të vërtetë është nul, pasi të gjitha vendimet e marra nga kreu i Foltores, Kuvendet e thirrura prej tij apo edhe Këshilli Kombëtar janë ilegjitime, kjo për faktin se vendimi Zhukrit nuk ka dhënë asnjë efekt ligjor dhe nuk është i formës se prerë.
Vendimi që pritet të marrë Apeli në datën 3 pritet të shkundë Partinë Demokratike dhe çdo vendim i dhënë do të japë një efekt të fortë në zgjedhjet e 14 majit. Por ky favorizim që i është bërë Berishës nga KQZ tregon se Celibashi ka lidhje të forta me ish-kryeministrin Sali Berisha. Kreu i Foltores edhe kur Celibashi ka qenë ministër i socialistë asnjëherë nuk e ka sulmuar. Lidhjet e tij me kreun e KQZ janë të hershme. Por më e befasishmja në këtë mes është se Celibashi i është bashkuar lojës anti-amerikane për të shkatërruar pushtetin vendor.
SHBA ka qenë gjithmonë e prerë dhe e qartë për drejtimin e selisë blu. Ata njohin PD zyrtare dhe kanë deklaruar se kurrë nuk do të bashkëpunojnë me një non-grata. SHBA, kur foli për ndarjen e Partisë Demokratike në dy pjesë theksoi se do të vazhdojë të takohet vetëm me ata që njeh ligji. Kim deklaroi se për SHBA nuk është garë popullariteti, ndërsa shtoi se asnjë zyrtar i saj nuk do të takohet asnjëherë me dikë të përcaktuar non grata. Pra me presionin e fortë të ndërkombëtarëve nga mbrapa, shou që po jep Celibashi pritet të marrë shumë shpejt fund.
