Stalla e lopëve u bë sebep qe imami nga Jashanica e Klinës, Asllan Bajraktari, të arrestohet javën e kaluar nga Policia e Kosovës për shkak të kërcënimit që ai bëri ndaj familjes së presidentit Hashim Thaçi. Imami kishte kohë që kishte kërkuar subvencion për të rritur biznesin e tij përmes shtetit, mirëpo nuk e kishte marr. E në mungesë ‘të hakmarrjes ndaj presidentit Thaçi”, dhe institucioneve tjera përgjegjëse, imami nga Jashanica e Klinës kërcënoi vëllain e Thaçit. Express ka shkuar në familjen e imamit Asllan Bajraktari, i cili prej një jave qëndron në paraburgim në Pejë pas kërcënimit që bëri ndaj Thaçit.
Vëllai i imamit, Fehrati, tregon se vëllai i tij kishte shkuar te prindërit e Thaçit për të ditur se çfarë po ndodhte me subvencionet qe nuk iu dhanë asnjëherë. “Qe prej 5 vitesh na kanë gënjyer. Unë nuk di që ai ka bërë ndonjë vepër të keqe. Atij s’ju përgjigj askush, plus që pesë vjet e sorollasin poshtë e lartë dhe nuk i kishin treguar se pse nuk plotësonte kushtet”, shprehet vëllai i imamit. Mes të tjerash ai tregoi se vëllai i tij kishte shkuar që të kërkonte ndihmë tek familja e Thaçit.
“Ka shkuar te shtëpia e tyre me kërkuar një ndihmë, por nuk e di se si e pritën ata. Policia prej asaj ditë, e kanë marrë në 1 të natës dhe neve sna kanë dhënë asnjë përgjigje. Sot na dhanë lejen ta takojmë. Ai nuk është kriminel me ja bërë këtë”, pohoi Fehrat Bajrahtari. Ndërsa, Policia e Kosovës gjatë bastisjes ka deklaruar se tek shtëpia e Asllan Bajraktarit është gjetur edhe një arme, fakt që e pohon edhe vëllai i hoxhës së Jashanicës.
“E kanë gjetur një armë. Ajo ka qenë një armë e prishur e luftës që e ka mbajtur për kujtim. Këtë e di edhe Hashim Thaçi, Kadri Veseli Rexhep Selimi, e që i pari njeri që ka prurë armë në Kosovë me traktor është Hoxha”, ka treguar Fehrati. Express ka tentuar të bisedoj edhe me familjen e kreut të shtetit po këta nuk ka qenë të gatshëm të përgjigjen. Ndërsa, Prokuroria e Mitrovicës tha se i dyshuari është arrestuar dhe është dërguar në paraburgim. Tashmë i dyshuari Asllan Bajraktari po mbahet në burgun e Pejës.
