Sipas një tradite të çuditshme në Danimarkë, të rinjtë që mbushin 25 vjeç dhe janë të pamartuar duhet të mbulohen me kanellë nga familja dhe miqtë.
Tradita mund të datojë qindra vjet më parë, kur shitësit e erëzave udhëtonin shumë, ndaj dhe mbeteshin beqarë sepse ata kurrë nuk qëndronin mjaftueshëm në një vend “për të hedhur rrënjë” e për të krijuar familje.
Shumë nga këta shitës nuk gjetën kurrë një partnere dhe u quajtën Pebersvends, që do të thotë burrat-piper. Një grua beqare quhet ndërkohë “Pebermø”, apo “zonja me piper”. Për këtë arsye, kur vendasit mbushin 30 vjeç dhe mbeten të pamartuar, kanella zëvendësohet nga piperi.
Para se të mbulohen me kanellë, të rinjtë lidhen me një shtyllë nga miqtë e tyre, dhe nuk largohen prej aty derisa i pamartuari të mbulohet plotësisht me kanellë.
Tradita u bë e njohur mes popujve të tjerë falë fotove virale në internet dhe së fundmi, një përdoruese e TikTok e solli sërish këtë zakon në vëmendjen e përdoruesve të internetit, duke mbledhur mbi 1 milion pëlqime në klipin e saj.
Sigurisht, kjo traditë është thjesht një mënyrë argëtuese për të qeshur me miqtë, pasi askush nuk gjykohet në ditët e sotme nëse nuk martohen të rinj. Aktualisht, shumica e danezëve martohen mes moshës 32-34 vjeç.
