Kryetarja e Lëvizjes Socialiste për Integrim, Monika Kryemadhi e konsideroi Sali Berishën liderin e vërtetë të PD, madje këtë e pranon, sipas saj, dhe rivali i tyre politik, kryeministri Edi Rama.
Në një intervistë televizive, Kryemadhi lavdëroi betejën politike të ish-kryeministrit për marrjen e drejtimit të PD dhe opozitës. “Te zoti Berisha të gjithë shikojnë liderin, madje edhe Rama e sheh të tillë. Berisha tregoi që është lider.
Tregoi që është jo vetëm themeluesi, por shpirti i PD. Tregoi që kur edhe pabesia kaloi moralin, ai jo vetëm që mbijetoi, por me një angazhim të jashtëzakonshëm burrëror ia doli. Duam apo nuk duam ne, PD është themeluar nga Berisha”, u shpreh fillimisht Kryemadhi.
Ajo e konsideroi dorëheqjen e Lulzim Bashës nga lidershipi demokrat si të vonuar. Kryemadhi akuzoi Bashën se dëmtoi LSI pas zgjedhjeve të 25 prillit 2021. Sipas kryetares së LSI, Lulzim Basha ishte politikan që veproi për mbrojtjen e interesave personale. “Që të jem e sinqertë, nuk e kam ndjekur fjalimin e tij.
Ishte një veprim i vonuar i tij. Unë nuk jam askush për të komentuar ngjarjet në PD, por tradhtia e Bashës dëmtoi LSI në maksimum, me 4 mandate që do ta paguajë Kryemadhi. Një perceptim që në fakt është perceptimi im, që ai ka qenë sipërfaqësor në lidhje me vendin, por asnjëherë sipërfaqësor me interesat e tij”, vazhdoi më tej liderja e LSI Kryemadhi.
Më tej,ajo deklaroi se PD-LSI do të zgjerojnë frontin opozitar duke u koordinuar me lëvizjet studentore, qytetare, etj. “PD në fund të prillit do të ketë Kuvendin, ndërkohë që edhe LSI është në një ristrukturim të saj.
Edhe shumë lëvizje që kanë të bëjnë me qëndresën qytetare, studentët dhe shumë grupe të tjera interesi, do të unifikojnë një opozitarizëm të qëndrueshëm dhe të pahapur”, përfundoi Monika Kryemadhi.
