Një pjesë e shqiptarëve nuk e kanë qejf punën dhe kjo kuptohet lehtë me faktin që lokalet janë plot në çdo orë të ditës. Por sa është numri i atyre për të cilët ka punë por ata i rrinë larg asaj? Deputetja e Partisë Socialiste Milva Ekonomi bëri publike dje se 89 mijë shqiptarë janë inaktivë, ose e thënë troç dembelë.
E ftuar në emisionin “Debati në Channel One” të gazetarit Roland Qafoku, Ekonomi u mbështet në shifrat e INSTAT duke sqaruar se në popullsinë tonë me 2.87 milionë banorë janë 89 mijë persona që nuk punojnë dhe nuk pranojnë punët që iu afrojnë.
“Ata as nuk kërkojnë dhe as nuk pranojnë punën edhe kur e kanë këtë mundësi”, tha deputetja e PS. E thënë me fjalë të tjera, këta 89 mijë janë dembelët e shoqërisë sonë. Dhe në fakt ka një lidhje mes kësaj shifre dhe asaj tjetrës që Shqipëria është në vend të dytë në botë për nga numri i bar kafeve, pas Spanjës.
Sipas revistës “Monitor”, në Shqipëri ndodhen 654 bar kafe për 100 mijë banorë, një shifër shumë e lartë. Por nëse në Spanjë bar kafet janë të përqendruara në zonat turistike dhe plazhet, në Shqipëri bar kafet ndodhen në qendrat urbane që nuk kanë lidhje me turizmin. Pra, kemi 654 bar kafe për 100 banorë, por kemi edhe 89 mijë dembelë. Janë dembelët e Shqipërisë.
