Shtetet e Bashkuara të Amerikës u kanë dërguar një mesazh të qartë të gjithë pushtetarëve shqiptarë në vend që janë skeptikë për reformën në drejtësi. Emra si Sali Berisha, Monika Kryemadhi, Petrit Vasili dhe eksponentë të tjerë të PD e LSI në çdo dalje televizive shprehen se reforma në drejtësi ka vdekur dhe ajo është kapur nga qeveria. Por dje ka ardhur një përgjigje e qartë nga ambasada e SHBA.
Zëvendës Shefi i Misionit në Detyrë, Dan Koski në Konferencën “Planifikimi Urban dhe Zhvillimi Ekonomik Vendas” tha dje se reforma në drejtësi është në rrugën e duhur. “Reforma në drejtësi vazhdon të ecë përpara, në rrugën e duhur, sipas planit. Shtetet e Bashkuara janë krenare për ndihmën që po u jepet këtyre institucioneve ndërsa ecin përpara. Shqipëria do të ketë shumë shpejt sistemin e ndershëm dhe transparent të drejtësisë që Kushtetuta parashikon.
Qytetarët shqiptarë duhet të ndihen të sigurt për këtë gjë – reforma në drejtësi nuk do të ndalojë’, tha ai. Më tej, diplomati amerikan e bëri të qartë se SHBA do të asistojë në goditjen e krimit dhe korrupsionit. Sipas tij, vetëm në këtë mënyrë do kthehet besimi te drejtësia. “Shtetet e Bashkuara do të vazhdojnë të mbështesin përpjekjet e Shqipërisë për të ndërtuar atë ëndërr. Ne do të vazhdojmë të ndihmojmë Shqipërinë për të goditur rrjetin e korrupsionit dhe për të çmontuar rrjetet e krimit të organizuar.
Së bashku, ne kemi bërë progres që tashmë mund të nxjerrim në pah. Është përparim që do ta bëjë Shqipërinë një vend të sigurt për investitorët”, tha më tej zyrtari amerikan. Sipas tij, korrupsioni është një shqetësim serioz. Ai tregoi se korrupsioni ndikon në ekonomi dhe në shumë fusha, kjo pasi ndal investitorët. “Planifikimi strategjik territorial është themelor për çdo ekonomike në lulëzim, i bën komunitetet me tërheqëse për investimet e huaja dhe të brendshme, ai është çelës për përmirësimin e integritetit të qeverisjes dhe realizimin e shërbimeve publike. Ai ndihmon që burimet të drejtohen saktësisht në përmirësimin e shërbimit ndaj qytetarëve.
SHBA dhe Shqipëria së bashku kanë forcuar komunitetet lokale me anë të planifikimit territorial. Por ka ende shumë për të bërë për krijimin e klimës së biznesit mirëpritëse për investitorët. Korrupsioni mbyt çdo nivel të qeverisjes, ndërsa krimi i organizuar dëmton biznesin legjitim. Gjithashtu një gjyqësor i kompromentuar nxit klientelizimin e manipulimin, duke larguar investitorët. Shqipëria ka bërë progres, por rruga e ndërtimit të ëndrrës shqiptare është ende e gjatë”, tha ai.
Bashkëpunimi Shqipëri-SHBA
Në vijim të fjalës së tij, zv/ambasadori amerikan deklaroi se bashkëpunimi mes Shqipërisë dhe SHBA është në nivele të mira. Sipas tij, Uashingtoni do vijojë të kontribuojë për të përmirësuar jetën e shqiptarëve. “Puna që ju po bëni është mbajtja e premtimit për një jetë dhe të ardhme më të mirë në Shqipëri për të gjithë shqiptarët. SHBA është krenare që kontribuon për këtë. Së bashku ne po hedhim themelet e një ekonomie të lirë, të drejtë e të shumëllojshme, që krijon mundësi për të gjithë.
Në SHBA ne kemi “ëndrrën amerikane” , ideali sipas të cilit të gjitha mundësitë janë të hapura për këdo. Këtu ju po ndërtoni ‘ëndrrën shqiptare’ për gjeneratat aktuale dhe të ardhshme të Shqipërisë. Prej një dekade projekti i planifikimit dhe qeverisë lokale nga USAID ka ndihmuar në ndërtimin e ëndrrës. Me anë të projekteve të tij ai ka punuar për zhvillimin ekonomik kombëtar dhe lokal. USAID ka asistuar përpjekjet e Shqipërisë për adoptimin e kuadrit ligjor planifikues”, tha zv/ambasadori. /Kliti Topalli
