Pas shpalljes “non grata” dhe bllokimit të pronave të ish-deputetit Aqif Rakip, biznesmenit Ylli Ndroqi dhe 5 politikanëve nga Mali i Zi, Maqedoni e Veriut dhe Bosnjë-Hercegovina, amerikanët kanë kërcënuar ish-kryeministrin Sali Berisha se do t’i sekuestrojnë pronat dhe pasuritë në bazë të ligjit 7031 pika C.
Dje Departamenti Amerikan i Thesarit dhe Departamenti Amerikan i Shtetit ndëshkoi Aqif Rakipin dhe Ylli Ndroqin, masa këto që përfshijnë dhe familjarët direkte. Në rastin e Rakipit, pyetja kryesore është mbi dy të afërmit e tij, dhëndrin e të vëllait dhe djalin, të dy anëtarë të Kuvendit, të dy të Partisë Socialiste, Saimir Hasalla dhe Ornaldo Rakipi.
“Top Channel” pyeti një zyrtar të lartë amerikan të thesarit edhe për këtë çështje. Përgjigja ishte se “pasojat janë për individët e përmendur, pra Rakipin në këtë rast, por po mblidhen prova dhe për çdo njeri tjetër sepse mesazhi është: Nuk duam individë të tillë të kenë këto pozita në shoqërinë shqiptare, tha një zyrtar i lartë i Departamentit të Thesarit.
Ndërkohë një zyrtar i larte i departamentit amerikan të shtetit i tha Top Channel se po shqyrtohet mundësia që edhe persona të shpallur ‘non grata’, në bazë të seksionit 7031, pika c, t’i nënshtrohen të njëjtave sanksione ekonomike, si Rakipi dhe Ndroqi, duke i dërguar kështu një mesazh të fortë ish-kryeministrit Berisha. Ndërkohë një zyrtar i lartë i Departamentit të Thesarit, i tha Top Channel se vendimet janë sinjale sesa seriozisht Shtetet e Bashkuara marrin korrupsionin, pasi korrupsioni është problemi kryesor i Ballkanit.
Aqif Rakipi shpallet “non grata”
Dje ish-deputeti i Elbasanit, Aqif Rakipi dhe pronari i mediave, Ylli Ndroqi janë shpallur “non grata” nga Departamenti Amerikan i Shtetit, ndërsa janë bllokuar të gjitha pronat e tyre në SHBA. Pjesë e listës së zezë ku e kanë të ndaluar të hyjnë në SHBA dhe bllokimit të pasurisë janë edhe pjesëtarët e familjes së tyre të ngushtë.
Aqif Rakipi dhe Ylli Ndroqi akuzohen nga SHBA si persona të cilët kërcënojnë stabilitetin e Shqipërisë përmes korrupsionit, aktivitetit kriminal dhe sjelljeve të tjera destabilizuese të vendit.
Për DASH dhe Departamentin e Thesarit sjellje të tilla korruptive minon sundimin e ligjit dhe rritjen ekonomike, si dhe iu mohon njerëzve në këto vende mundësi dhe stabilitet. Departamenti i Thesarit amerikan ka vendosur në fuqi ndaj Ylli Ndroqit dhe Aqif Rakipit urdhrin Ekzekutiv 14033 që thotë:
“Bllokimi i pronës dhe pezullimi i hyrjes në Shtetet e Bashkuara të disa personave që kontribuojnë në situatën destabilizuese në Ballkanin Perëndimor”.
Rakipi dhe Ndroqi “non grata”, reagon Antony Blinken
Sekretari i Shtetit të SHBA, Antony Blinken reagoi pasi SHBA shpalli dje “non grata” ish-deputetin e PS, Aqif Rakipi dhe biznesmenin Ylli Ndroqi në Shqipëri së bashku me ish-politikanë dhe funksionarë shteti në Malin e Zi, Maqedoni e Veriut dhe Bosnje-Hercegovinë. Në “Tëitter”, Blinken i konsideron këta persona si kërcënim për stabilitetin, progresin dhe integrimin evropian të shteteve të Ballkanit Perëndimor.
“Sot, DASH dhe Departamenti i Thesarit të SHBA ndërmori veprime për të përcaktuar disa aktorë në Ballkanin Perëndimor për aktivitete destabilizuese dhe korruptive. SHBA dhe partnerët e saj si Britania e Madhe bëjnë përgjegjës ata persona që kërcënojnë stabilitetin, progresin dhe integrimin evropian të rajonit”, shkruan Blinken.
Pas Rakipit dhe Ndroqit, SHBA 5 zyrtarë “non grata”, mes tyre edhe Nikola Gruevski
Departamenti Amerikan i Shtetit ka shpallur listën e zezë për Ballkanin Perëndimor, ku njofton se ka futur në listën e zezë 5 zyrtarë në Bosnjë Hercegovinë, Malin e Zi dhe Maqedoninë e Veriut, mes tyre edhe ish kryeministri i Maqedonisë Nikola Gruevski, i përfshirë në korrupsion.
Gjatë periudhës si kryeministër në vitet 2006 deri në vitin 2016, DASH thotë se Gruevski është përfshirë në korrupsion, pastrim parash, por edhe në vepra të tjera penale. DASH thotë se Gruevski ka penguar arrestimin e tij nga gjykata e Maqedonisë së Veriut.
BOSNJE-HERCEGOVINË
Pas përcaktimeve të Thesarit në 5 janar 2022 për Milorad Dodik dhe një ent biznesi nën kontrollin e tij, OFAC sot përcaktoi edhe dy zyrtarë të tjerë të korruptuar në Bosnje-Hercegovinë. Asim Sarajlic (Sarajlic) është deputet në parlamentin e Bosnje dhe Hercegovinës (BiH) dhe deri vonë ishte një zyrtar i lartë i Partisë së Aksionit Demokratik (SDA) në Bosnjë-Hercegovinë.
Sarajlic është subjekti famëkeq i “aferës Asim”, një skandal politik korrupsioni në të cilin Sarajlic u kap duke premtuar se do t’i siguronte një vend pune gruas së një delegati të partisë në këmbim të një vote për një pozicion politik partiak. Gordana Tadiç (Tadic) ka shërbyer si Kryeprokurore e Prokurorisë së Shtetit të BiH nga viti 2019 deri në 2021.
Në vitin 2021, ajo u hoq zyrtarisht nga pozicioni i saj nga Këshilli i Lartë Gjyqësor dhe i Prokurorisë pas dështimit të saj për t’i caktuar çështjet tek prokurorët përmes një sistemi automatik shpërndarjeje të çështjeve, i krijuar për të parandaluar vendimet e caktimit të prokurorëve bazuar në arsye personale ose politike. Përveç kësaj, Tadiç raportohet se përdori pozicionin e saj si Kryeprokurore për të nxitur interesat e saj personale dhe familjare.
MALI I ZI
Svetozar Marovic (Marovic) ka qenë President i shtetit të përbashkët të Serbisë dhe Malit të Zi nga viti 2003 deri në 2006 dhe shërbeu si ish-zëvendës president i Partisë Demokratike të Socialistëve të Malit të Zi (DPS) deri në vitin 2015. Marovic u arrestua nga autoritetet malazeze në 2015 në bazë të dyshimeve për përfshirje në raste korrupsioni në shkallë të gjerë lidhur me projektet e ndërtimit në bashkinë e Budvës.
Prokurorët malazezë e akuzuan Marovicin se përdori ndikimin e tij si zyrtar i lartë në DPS për të miratuar një sërë blerje pronash dhe ujdish ndërtimi, të cilat sollën përfitime të mëdha për disa kompani, por shkaktuan humbje të konsiderueshme për qeverinë vendore. Në vitin 2016, Marovic nënshkroi dy marrëveshje për pranimin e fajësisë, duke pranuar të gjitha akuzat kundër tij për korrupsion. Ai u dënua me disa vite burg dhe u urdhërua t’i kthente shtetit mbi 1 milionë dollarë, por u arratis në Serbi përpara se të vuante dënimin.
MAQEDONIA E VERIUT
Nikola Gruevski (Gruevski) është dënuar dhe mbetet i dyshuar në disa çështje korrupsioni, dhe është akuzuar për shpërdorim detyre, pastrim parash dhe vepra të tjera penale të lidhura me kohën e tij si Kryeministër i Maqedonisë së Veriut nga viti 2006 deri në vitin 2016. Ai e ka shmangur vazhdimisht arrestimin e vet për dënimin e vitit 2018 nga një gjykatë në Maqedoninë e Veriut për akuza të lidhura me korrupsionin, gjë e cila paraqet një pengesë serioze për llogaridhënien për korrupsionin dhe aktivitetet e lidhura me korrupsionin në Maqedoninë e Veriut.
Sasho Mijalkov (Mijalkov) është ish-shefi i kundërzbulimit në Maqedoninë e Veriut. Mijalkov dyshohet se ka qenë i përfshirë në një skemë të manipulimit të votave dhe një operacion të gjerë përgjimi të paligjshëm që shënjestroi 20,000 njerëz, përfshirë politikanë të opozitës, gjyqtarë dhe gazetarë, që siguroi përfitime politike dhe ekonomike dhe që nxiti një krizë politike dyvjeçare në vend duke zbuluar ndërhyrjen e pretenduar të qeverisë në gjyqësor, kontrollin mbi disa media dhe ndërhyrjen në zgjedhje.
Në shkurt të vitit 2021, për shkak të rolit të tij si organizator kryesor i skemës së përgjimeve, ai u dënua nga një gjykatë në Maqedoninë e Veriut për bashkëpunim kriminal, shpërdorim detyre dhe marrjen e shpërblimeve për ndikim të paligjshëm. Më vonë, në prill 2021, një gjykatë në Maqedoninë e Veriut e dënoi Mijalkovin për shpërdorim pushteti në lidhje me një marrëveshje prokurimi për pajisje survejimi. Mijalkov përcaktohet në bazë të E.O. 14033 sepse ka qenë përgjegjës ose bashkëpunëtor në, ose për përfshirje të drejtpërdrejtë ose të tërthortë në veprime apo politika që minojnë proceset apo institucionet demokratike në Ballkanin Perëndimor./Rigels Seliman
