Spartak Ngjela shpërtheu në akuza ditën e djeshme kundër presidentit të Republikës, Ilir Meta. Ky i fundit po tenton të bllokojë ndryshimet në qeveri sepse akoma nuk ka dekretuar 5 ministrat e rinj të propozuar nga Edi Rama, mes të cilëve bën pjesë edhe ai i Jashtmi, Gent Caka.
Për Cakën situata është më ndryshe sepse nëse për 4 ministritë e tjera Meta ka dekretuar lirimin nga detyra të ministrave aktualë, një gjë të tillë nuk e ka bërë me Ditmir Bushatin.
Kjo tregon që ai është i pasigurt për figurën e re nga Kosova. Këtë hezitim të kreut të shtetit për Gent Cakën, Ngjela e interpretoi si një fakt që tregon se Meta është i lidhur me Beogradin dhe Athinën.
“Kush nuk e do që ministri i Jashtëm në Shqipëri të jetë nga Kosova? Beogradi i pari, Moska e dyta, Athina. Meta ju ka dhënë shenja që është me Beogradin dhe me Athinën. Ju ka dhënë shenja edhe kundër interesit kombëtar. Ai qe me Gruevksin këtu, antishqiptari më i madh që ka kaluar atje me karakter millosheviçian. Po këtej e ke parë se çfarë bën me grekët, është në hall të madh”, tha avokati.
Sulmet ndaj kreut të shtetit Ngjela i vijoi më tej duke e cilësuar Metën si një njeri të korruptuar. Avokati shtoi se për shkak të korrupsionit e për të shpëtuar veten, presidenti po kërkon të shesë interesin e kombit.
“Nuk i tha njeri të korruptohej, nuk i tha njeri të dilte në media me video me regjistrim duke numëruar para me 200 mijë euro këtej e 300 mijë euro andej. Je bërë edhe president.
Rri qëndro atje dhe ruaj hallin tënd, nuk mund të bëhet halli yt edhe halli i Shqipërisë. Ka hall Rama, por nuk mund të bëhet edhe halli i Shqipërisë. Kishte hall Enver Hoxha se do të rrëzohej dhe e ktheu në hall të shqiptarëve. Ata vënë interesin e tyre mbi interesin e kombit”, u shpreh ai.
Ngjela ka sulmuar edhe Ditmir Bushatin.
“Ka 5 vjet ministri i Jashtëm, a ka ndonjë doktrinë Bushati, a ka ndonjë lëvizje të madhe? Më trego të gjitha sukseset e tij 5-vjeçare. Unë them që e mbajti kot aq gjatë, nuk duhet ta mbante në qeverinë e dytë sepse nuk kemi parë ndonjë diplomaci të rangut të lartë. Tani ndalemi tek ministri i ri.
Ministri i ri është kosovar dhe ky është një hap përpara. Tani të shohim se çfarë do të bëjë ai. Është një hap përpara që është kosovar, por nëse nga ana tjetër është me Beogradin, turp i qoftë. Meta nuk po e dekreton.
Fakti që Meta nuk është me interesin kombëtar dhe nuk po e dekreton tregon që këtë e kanë kërkuar faktori ndërkombëtar, është vendosur nga ata. I kanë kërkuar Ramës që të vërë një kosovar në Ministri të Jashtme.
Ne tani do të shohim se çfarë angazhimi do të ketë shqiptari i Kosovës. Pse mërzitet Meta? Ai nuk do që të vendosë një kosovar ministër të Jashtëm”, tha avokati Spartak Ngjela.
