Komisioneri Shtetëror i Zgjedhjeve shqyrtoi dje rezultatin e verifikimit të Prokurorit të Përgjithshëm për subjektin vetëdeklarues Dashamir Mehmet Tahiri, kandidat për deputet i propozuar nga Partia Lëvizja për Ndryshim, qarku Vlorë, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Komisioneri vendosi të deklarojë të përfunduar procedurën administrative pa vendim përfundimtar për subjektin vetëdeklarues Dashamir Tahiri, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve. KSHZ shqyrtoi rezultatin e verifikimit të Prokurorit të Përgjithshëm për subjektin vetëdeklarues Ashim Hysen Tafilaku, kandidat për deputet i propozuar nga Partia Lëvizja Socialiste për Integrim, qarku Shkodër.
Komisioneri vendosi se subjekti vetëdeklarues Tafilaku nuk ndodhet në kushtet e ushtrimit të funksionit publik të deputetit. Gjithashtu, Komisioneri shqyrtoi rezultatin e verifikimit të Prokurorit të Përgjithshëm për subjektin vetëdeklarues Artan (Ergi) Nazmi Bitri, kandidat për deputet i propozuar nga Partia Socialiste e Shqipërisë, qarku Durrës. Komisioneri vendosi se subjekti vetëdeklarues Bitri ndodhet në kushtet e ndalimit për t’u zgjedhur/ushtruar funksionin publik të deputetit.
