Ethet e listave po shtohen ndërsa afati i dorëzimit skadon mesnatën e të hënës. Veçanërisht në Partinë Socialiste, ku ndryshimet duken radikale, në presionin e mandatit të tretë, që sa më shumë afrohen ditët, aq më shumë duket i largët. Deri tani 3 deputetë kanë dhënë dorëhqjen me justifikimin standart: Do t’u hapim rrugë të rinjve. Por kush kërkon t’ju zërë karriget?
Jo vetëm emrat e panjohur nga “Deputeti që duam” janë pretendentë t’ju zënë vendet e të hyjnë në kuvend. Rreziku vjen edhe nga prurjet “ilegale” që erdhën në PS në vitin e zgjedhjeve. Janë të ardhurit nga LSI, Lefter Koka, Nasip Naço dhe Gledion Rehovica që duket se po vlerësohen më shumë se deputetët aktualë të Partisë Socialiste.
Ky vëzhgim nuk është konstatim mediatik por i vetë deputetëve të PS. Njëri prej tyre, Adnor Shameti me mënyrën e vet të drejtperdrejtë ka tronditur grupin e Partisë Socialiste. Jo grupin parlamentar, por grupin e Whatsapp- it ku janë edhe deputetët, edhe kryetarët e bashkive, edhe drejtuesit e PS, edhe vetë Edi Rama. Dosja.al ka arritur të sigurojë shpërthimin në grupin e maxhorancës, që flet shumë më tepër se farsa e vetëlargimeve, që siç duket, janë shkarkime nga Edi Rama, pa asnjë vendim forumesh.
Viktimë e zemërimit të deputetit, ka qenë pikërisht kryetari i Bashkisë së Tiranës, Erion Veliaj, që publikoi pak ditë me parë një foto me ish- deputetët e LSI qe kaluan me PS. “Bashkimi bën fuqinë”, shkruante me zell Veliaj, fjali që s’është përtypur mirë nga Shameti. Pasi hedh në grup lajmin e Dosja.al për postimin e Veliajt, komenti ishte i ashpër.
Siç mund ta shihni, deputeti i Beratit, zgjedh ta përmendë Veliajn vetëm si “lali”, për ta shpartalluar pastaj me argumente. Injorimi i socialistëve në Berat dhe tendenca për të larguar socialistë për Nasip Naçon “me 4 parti” dhe Gledion Rehovicën “e goditur nga dekriminalizimi”, për Shametin është një gabim i rëndë, në të cilin ka gisht edhe koordinatori i Qarkut Blendi Klosi.
Me ironi dhe argumente, Shameti e rrëzon strategjinë e rehabilitimit të ” tradhëtarëve” të LSI, duke i lënë pa fjalë anëtarët e grupit të ëhatsapp, ku administrator është vetë Edi Rama.
Teksti i SMS-së së Adnor Shametit dhe fotoja e ndarë prej tij në grupin e Whatsappit:
Jam shume dakord me lalin qe bashkimi ben fuqine, por ne radhe te pare me mua, Ermonelen, Fadilin, pastaj me prurjet qe kaluan me parametra zero ne merkaton e janarit, Gledionin (alias Mina Kusta) sipas vendimit per heqjen e mandatit nga dekriminalizimi dhe me pas Nasipi, qe e ka PS, vetem partine e katert ku aderon, pas qenies sekretar organizate ne PPSH ne Fakultetin juridik, kur ishte student i ardhur nga klasa punetore nga shkolla e mesme e nates, faji i babait tim qe ishte shef arsimi ne ate kohe, aderimit ne PAD e Cekes si drejtor kuadri ne MB, LSI dhe tani e katerta, e verteta. E me te drejte gjyshi im ne keto kushte kur dhe kryeplaku po mer vrull te kandidoje vete ne BR, do te thoshte, zoti e ndihte shef Klosin (u ngrita ne kembe per te disaten here).
Pas shpërthimit të Shametit nuk ka patur asnjë koment nga Veliaj dhe Klosi, madje as nga vetë Rama.
Tashmë, pritet përjashtimi i Shametit nga grupi, ai i Whatsapp-it se grupi parlamentar tashmë nuk ka më vlerë. Me siguri, për Shametin do të gjendet një “kalama” i cili kërkon të aprovohet. Por më e rëndësishme mbetet lista që do dorëzohet të hënën në Komisionin Qëndror të Zgjedhjeve. A do jenë Adnor Shameti dhe Ermonela Felaj në Berat? Apo do zëvendësohen nga Naço dhe Rehovica? E sigurtë është që java që vjen do ketë polemika të ashpra brenda partive dhe koalicioneve./Dosja.al
