Sot dosja ndaj Lulzim Bashës, për çështjen e lobimit në SHBA, ka përfunduar në Gjykatën e Tiranës gati një muaj pas debatit midis prokurorëve të çështjes dhe kryeprokurores së Tiranës, Elisabeta Imeraj. Fati i kryedemokratit varet tashmë nga gjyqtari paraprak. Burime për Top Channel tregojnë se dosja me Bashën të dyshuar për akuzën e “falsifikimit të dokumentave” ka përfunduar në Gjykatën e Tiranës.
Por sikurse pohojnë burimet, kryeprokurorja e Tiranës, Elisabeta Imeraj, ka bërë një udhëzim që kërkon nga prokurorët të kryejnë hetime shtesë, siç është pyetja e Nikolas Muzin, lobist në SHBA. Por ligji parashikon pavarësinë e prokurorit të çështjes. Në pamundësi të cënimit të pavarësisë së prokurorit, Imeraj ka përcjellë në gjykatë konstatimet mbi pavlefshmërinë e mundshme, të cilën, në bazë të ligjit është gjykata që vendos.
Tashmë gjyqtari paraprak do të vendosë nëse Lulzim Basha do të gjykohet apo çështja do të kthehet për hetime të mëtejeshme.
Arben Ristani dhe Ilir Dervishi janë dy zyrtarët e tjerë të PD-së që akuzohen në këtë çështje për “falsifikim dokumentesh”.
Në gjykatë, siç thonë burime të Top Channel, do jenë vetëm dy prokurorë para gjyqtarit paraprak, Kol Hysenaj dhe Gjergj Tako, pasi prokurori i tretë, Ervin Karanxha, është zëvendësuar nga kryeprokurorja e kryeqytetit, Elisabeta Imeraj.
Në nisje të hetimit prokurorët kishin në dorë deklarimet se për lobimin e Partisë Demokratike në Shtetet e Bashkuara të Amerikës ishin paguar 650 mijë dollarë për lobistin Nik Muzin, me pagesa që shkonin nga disa drejtime një prej të cilës nëpërmjet një kompania off shoore të quajtur “Biniata Trade”, që në një seri lidhjes përfundonin te dy shtetase ruse, aktiviteti i së cilave është regjistruar në Belize.
Por dy prokuroret Ervin Karanxha dhe Gjergji Trako, mbyllen hetimin dy vjeçar duke rrëzuar akuzën për “pastrimin e parave” dhe duke lënë vetëm akuzën e “falsifikimit të dokumentave”, që dënohet nga tre deri në shtatë vite burgim.
Për këtë vendim, prokurorët Karanxha dhe Trako nuk kishin njoftuar kolegun e tyre, Hysenajn, i cili nuk firmosi për mbylljen e hetimeve.
Ndërkohë që lobisti amerikan, Muzin, nën hetim në vendin e tij për këtë çështje, është penduar dhe ka vendosur që të flasë, por kërkon që mos dënohet në Shqipëri, dhe për t’i dhënë këtë garanci, prokurorët shqiptarë kanë vendosur pushimin e akuzës për pastrim parash.
Ja çfarë thuhet shprehimisht në dokumentin e dy prokurorëve Trako dhe Karanxha:
“Së dyti, nga korespondenca e bërë me autoritetet e ndjekjes penale të Shteteve të bashkuara të Amerikës, të bërë nga Prokuroria e Tiranës, rezulton se shtetasi Nik Muzin, ka vendosur që të flasë për këtë çështje penale (lobimin e kryer). Autoritetet amerikane i kanë dhënë garanci se nuk do të ndiqet penalisht në Amerikë ky shtetas, në rast se jep deklarime për të zbardhur ngjarjen. Prokurori amerikan ka komunikuar me Prokurorinë e Tiranës ku përcjell kërkesën e Nikolas Muzin për të mos pasur përgjegjësi penale në territorin e Shqipërisë në këmbim të dhënies së dëshmisë së plotë me qëllim zbardhjen e plotë të ngjarjes”.
Prokurorët arsyetojnë se në këto kushte duhet pushuar akuza për nenin 287, pastrim parash nga Shqipëria, që Nik Muzin të flasë lirisht në Amerikë.
