Komisioni hetimor për ish-ministrin e Brendshëm, Saimir Tahiri dhe fenomenin e drogës ka dështuar. Vendimi për ngritjen e këtij komisioni u mor në datën 5 mars, ndërsa me 15 mars u përcaktuan edhe të gjithë anëtarët e tij. Duke qenë se ky komision ishte kërkuar nga Partia Demokratike, drejtimin e komisionit do ta merrte po ajo, ndërsa Partia Socialiste do të kishte shumicën e deputetëve në komision.
Mirëpo që nga momenti i ngritjes dhe deri më tani, kryetari Edi Paloka e ka thirrur komisionin vetëm 3 herë, ndërsa në total janë zhvilluar 4 mbledhje nëse llogaritet edhe ajo e drejtuar nga socialistja Ermonela Felaj. Sidoqoftë, katër mbledhje janë shumë pak për punën e këtij komisioni, i cili ka një afat pune 6-mujor.
Përgjatë muajit gusht është e pamundur që komisioni hetimor të mblidhet sepse Kuvendi ka marrë pushimet. Por duket se e pamundur është që mbledhja e radhës të zhvillohet edhe në shtator sepse pikërisht në datën 5 shtator këtij komisioni i mbaron afati, ndërsa nuk dihet data e saktë se kur Kuvendi rifillon punën.
Puna e komisionit
Përgjatë këtyre gjashtë muajve duhet të ishin zhvilluar diskutime të rëndësishme sa i takon lidhjeve të politikanëve me krimin dhe fenomenit të drogës, madje për këto çështje duhet të kishin dalë edhe fakte të reja dhe interesante. Mirëpo puna e komisionit hetimor u kufizua vetëm me akuzat politike dhe dërgimin e shkresave për informacione nëpër institucionet shtetërore.
Për këto shkresa u zhvillua edhe një debat shumë i fortë mes anëtarëve opozitarë dhe mazhorancës në mbledhjen e fundit, sepse Partia Socialiste kërkonte që përveç të tjerash, të merrte të dhëna nga institucionet shtetërore edhe për lidhjet e Shkëlzen Berishës me drogën; çështjen e Lazaratit dhe mos-ndërhyrjen në këtë zonë nga kryeministri i asaj kohe, Sali Berisha si edhe për lidhjet e mundshme mes Klement Balilit dhe ish-ministrave të LSI.
Por duket se këto çështje e kanë trembur opozitën, duke qenë se ky komision nuk u thirr më asnjëherë për të zhvilluar mbledhjen e radhës. Madje kujtojmë që kryetari Edi Paloka u shndërrua edhe në pengesë për hetimin e çështjeve të socialistëve sepse nuk pranonte që të firmoste shkresat e tyre drejtuar institucioneve. Gazeta raportoi pak kohë më parë që Partia Demokratike po e mbante pezull punën e komisionit, por tanimë hetimi i Shkëlzen Berishës dhe lidhjeve të Balilit me LSI ëshë i pamundur për shkak të përfundimit të afatit.
Duhet theksuar fakti se zvarritjen e punës së komisionit hetimor e shkaktoi opozita sepse është në kompetencë të kryetarit që të thërrasë mbledhjet. Mirëpo duket se me dorëheqjen e ish-ministrit të Brendshëm, Saimir Tahiri, i cili ishte edhe objekt hetimi nga opozita, kauza e kësaj të fundit ra dhe vëmendja u përqendrua në tema të tjera.
Zgjatja e afatit
E vetmja kartë që mund të luhet për vijimin e punës së komisionit hetimor mund të jetë kërkesa e opozitës për të zgjatur afatin e tij. Gazeta u interesua si pranë kampit socialist, ashtu edhe atij demokrat për këtë mundësi, por nuk mori një përgjigje të prerë. Anëtarët e Partisë Socialiste deklaruan se për këtë gjë duhet të vendosë demokrati Edi Paloka sepse ai është edhe kryetari i komisionit.
Ndërsa kampi opozitar u shpreh i pavendosur akoma për këtë pikë sepse ashtu sikurse e theksuam më lart, me largimin e Tahirit nga politika, nuk ka më vlerë që të hetohet figura e tij. Në këto kushte, mund të themi se komisioni hetimor ka dështuar dhe hetimi i Shkëlzen Berishës dhe lidhjet e Balilit me LSI u penguan. / Mimoza IBRA
