Për ish ministrin e jashtëm, Ditmit Bushati fokusi kryesor i Shqipërisë në lidhje me procesin e hapjes së negociatave në këtë periudhë duhet të jetë garantimi i një konsensusi brenda vendeve anëtare.
Kur na ndajnë edhe pak ditë nga publikimi i raportit vjetor të Komisionit Europian lidhur me hapjen e negociatave për Shqipërinë, Bushati është shprehur në një intervistë për Vizon Plus se ky raport vjen në plan të dytë krahasuar me nevojën për të marrë aprovimin e të gjitha shteteve anëtare.
“Ne jemi në kushtet kur pritshmëria kryesore duhet të jetë për datën dhe jo më për raportin. Duhet të kujtoj që Maqedonisë së Veriut që nga 2009 nuk i ka munguar një rekomandim nga Komisioni Europian që shoqëronte Raportin e Progresit apo raportin vjetor, dhe në një dekadë pavarësisht se kishte në mënyrë të përvitshme përsëritjen e rekomandimit, nuk e pati të mundur të fillonte bisedimet për anëtarësim.
Prandaj në këtë moment fokusi ynë kryesor duhet të jetë sigurimi i konsensusit brenda vendeve anëtare në mënyrë që Shqipërisë ti jepet data”, tha Bushati.
Përsa i përket gjendjes së brendshme të vendit ai e cilëson si shumë të rëndësishme stabilitetin e saj dhe bën apel se palët politike në vend duhet të tregohen të përgjegjshme.
“Sigurimi i konsensusit tek vendet anëtare, bazuar tek përsëritja e një rekomandimi që do të vinte nga Bashkimi Europian, do duhet të shoqërohet dhe me përgjegjshmëri politike që do duhet të vij nga Shqipëria,”shtoi ai.
