Prokurori i Apelit Durrës, Bujar Hoti, është shkarkuar sot nag detyra, pasi nuk kaloi dot me sukses ‘filtrat’ e Vettingut. Hoti doli pak ditë më parë para trupës së KPK dhe ndërkombëtarëve, ku dha llogari për pasurinë, për lidhjet me krimin dhe aftësitë profesionale.
Gjatë seancës dëgjimore, pati një moment të pakëndshëm për prokurorin Hoti, teksa u përplas me përfaqësuesit e ONM. Teo Jacobs replikoi me prokurorin, teksa i tha hapur se po përpiqej t’i shiste skenarin për pasurinë e tij panelit të KPK.
Më poshtë, debati i plotë mes prokurorit Hoti dhe përfaqësuesit të ONM, Teo Jacobs
Teo Jacobs: Unë do shkoj për të blerë bukë dhe kek, por do shkoj t’i blej tek kasapi. Zoti Hoti, ju po përpiqeni t’ia shisni këtë skenar panelit. Këtu duhen thënë të vërteta. Ju s’keni patur kursime dhe thoni që në vitin 2007, përdorët kursimet e vitit 2005, që nuk i deklaruat në vitin 2006. Morët një kredi prej 70 mijë euro, dhe kjo kredi kaloi në llogarinë personale të administratorit të kësaj kompanie.
Julian Mërtiri, avokati i Hotit: Kërkoj që pyetjet e përfaqësuesit të ONM të shkruhen në kontekstin e realitetit shqiptar.
Prokurori Bujar Hoti: Kam 32 vite që punoj si hetues. Askush s’ka kurajo të më kërkojë anën morale dhe ekonomike. Kam standart dhe jam përplasur me grupe kriminale të ndryshme. Kam mbuluar mbi 60% të Shqipërisë, dhe për këto jam shpërblyer. Moto kam vetëm punën, e s’kam asnjë vërejtje apo ankesë.
