Mëngjesin e sotëm ka nisur aksioni për shembjen e banesave tek Astiri në kuadër të projektit të “Unazës së Madhe’. Forca të shumta policie kanë mbërritur që prej orës 06:30 ndërsa banorët kishin dalë në rrugë përpara tyre duke i pritur me protestë e mos lejuar shembjen e banesave dhe bizneseve të tyre pa dalë dikush garant se do të shpërblehen për investimet dhjetëra vjeçare që kanë bërë që prej kohës kur janë vendosur aty.
FNSH dhe forcat ‘Shqiponja’ aksion në Astir, bllokohet qarkullimi, banorët dalin në rrugë/ Ja çfarë po ndodh!
“S’ka koment me këtë shtet, me çfarë ti mbrojmë, nuk kemi me çfarë ti mbrojmë. Kanë ardhur kanë vendosur gishtin dhe do ti prishin”, tha një banor.
“Do të bëjmë luftë, aty do vdes, si të më prishet shtëpia ku të shkoj. Si të sillen ata do sillemi edhe ne”, paralajmëroi një banor tjetër.
“Unë jam dy kurora aty, ku të shkoj të ma gjejë. Kanë ardhur pas asnjë dokument dhe asnjë rrugëzgjidhje. Edhe serbi nuk ia ka bërë kosovarit siç po ma bën shteti im këtu. Ne e kemi bërë këtë vend, e kam gjetur moçal kur kam ardhur në fillim, kam 27 vjet këtu. Jam në proces legalizimi, kam të gjitha letrat e tokës, më thotë e ke banesën pa leje, pse s’ma bërë legalizimin si shtet që je. Për biznesin s’po pyes por për shtëpinë do të ngjitem lart. Kam paguar të gjitha faturat dhe taksat tash 25 vjet. Pse më sjell fatura kur s’jam e rregullt, pse më la të ndërtoj? Nuk është në rrugë shtëpia ime të betohem, jam 30 metra larg rrugës, duan të ma prishin si objekt që ta marrin për vete”, tha pronarja e një banese tre katëshe.
“Këta policë këtu nuk po mbrojnë shtetin, këta po mbrojnë pushtetin. Nuk po mbrojnë të drejtat e qytetarëve aspak, por për të mbajtur një regjim. Bëmë një marrëveshje me Bashën dhe me sa duket kjo e ka zbehur protestën, e kanë bërë fakt të kryer shembjen e banesave. Shkon kërkon donacione për të prekurit nga tërmeti, shemb banesat tona që i kemi. Ne nuk luftojmë dot me shtetin, ata duan që ne të përplasemi, mund të duan edhe viktima duke përligjur punën e policisë. Ne jemi për të treguar se po shkelin ligjin, jemi në të drejtën tonë, për pronën dhe familjen tonë”, tha një banor tjetër
