Teksa Shqipëria është përfshirë në kthetrat e koronavirusit, ish-kryeministri Sali Berisha ka zgjedhur të mos bashkohet dhe sensibilizohet në këtë situatë. Berisha vijon të përhapë panik dhe lajme të rreme përmes faqes së tij personale në “Facebook”, përmes së cilit pretendon se informacionin e merr nga qytetari dixhital, por dhe nga burime të sigurta.
Pak minuta më parë, Berisha ka reaguar në rrjetet sociale, duke hedhur akuza të forta ndaj kryeministrit Edi Rama dhe Ministrisë së Shëndetësisë, ndërsa pretendon se situata është alarmante dhe se qeveria po fsheh të vërtetën, pasi sipas tij, numri i qytetarëve të infektuar me Covid-19 është më i madh se ai që është deklaruar zyrtarisht.
“Këshilla jo miqësore për Edvinin PPP Maskën dhe Ndrikull Hajni Maskën dhe ndonjë tjetër që keqshfrytëzohet nga ata! Mashtrues! Për të thelluar me tej manipulimin, zvogëluar numrin e të infektuarve dhe sheshuar fare kurbën dhe për t’u vetëshpallur vendin kampion me rastet më të pakta me covid-19 ju këshilloj: Vazhdoni të kontrolloni rreptësisht linjën e testimeve siç bëni deri sot; Mos gaboni që të decentralizoni se nuk do ta kontrolloni dot si deri tani; kontrolloni dhe testoni si deri me sot individë me kontakte me covid-19; veçanërisht testoni sa më pak personel mjekësor se midis tyre ka përqindje të lartë infeksioni; Kontrolloni sa më rreptë 127 që të shpallin në distancë grip çdo temperaturë apo edhe kollë.
Miq, këshillat e mia janë një sarkazëm sepse kjo bandë e kryesuar nga Edvin PPP Maska dhe ndrikull Hajni Maska nuk ka nevojë për këto këshilla, pasi kështu po vepron, po mashtron manipulon dhe falsifikon çdo ditë të dhënat e statistikat e epidemisë me qëllim që të shpallen krejt më të mirët e rajonit, por dhe Europës! Aferim!! Sb”, shkruan Berisha. Pra, duket qartë që ish-kryeministri Sali Berisha po shfrytëzon situatën për të përhapur panik dhe të bëjë politikë dhe se për të nuk ka rëndësi jeta e qytetarëve.
