Emisioni “Inside Story” ka publikuar sonte një investigim për operacionin ndërkombëtar “Shpirti” që shkatërroi një grup organizatash shqiptare të lidhura me mafian italiane në trafikimin e kanabisit.
Emisioni ka publikuar fakte nga nënshtrimi i eksponentëve të policisë që mbronin ngarkesat dhe fiknin radarët detarë. Por jo vetëm kaq. Në dokumentet e anti-drogës italiane zbulohet edhe dëshmia e panjohur e të penduarit që nxjerr zbuluar një prokurori të SPAK-ut. Bëhet fjalë për prokurorin Ened Nakuçi, sot pjesëtar i Prokurorisë së Posaçme Kundër Korrupsionit dhe Krimit të Organizuar, ndërsa kur u zhvillua operacioni ishte Prokuror të Krimeve të Rënda, emri i të cilit është hequr nga dosja hetimore shqiptare.
Aksioni ndërkombëtar “Shpirti” nxorri zbuluar implikimin e disa zyrtarëve në linjën e trafikut. Drejtori i Zyrës së Punës në Kavajë Saimir Kurti, shoqëruesit e Tahirit, Agustin Deda dhe Hekuran Marku dalin nga përgjimet si pjesëtarë aktivë dhe zotërues të lëndës narkotike që trafikohej.
“Ne kemi sinjalizuar autoritetet shqiptare për gjërat që kishin dalë nga hetimet tona, u kemi çuar kopje të akteve, u kemi çuar kopje të interceptimeve nga dilnin të dyshuar të rëndësishëm njerëz që do të duhej të përfaqësonin institucionet…”, thotë prokurori Francesco Gannetta.
Drejtori i administratës dhe dy shoqëruesit ishin të përfshirë direkt sipas hetimeve, duke qenë njëkohësisht edhe garanci për suksesin e operacioneve të trafikut. Të gjithë grupet që bashkëpunonin në kuadër të strukturës kriminale, kishin disa lidhje të tjera të rëndësishme në polici dhe sistemin e drejtësisë.
“Nga provat e siguruara rezulton se Ilirian Ducellari për trafikimin e drogës në kuadër të grupit të strukturuar kriminal kishte mbështetjen e zëvendësdrejtorit të Policisë së Vlorës Ilirjan Balla dhe efektivit të Policisë Kufitare të Vlorës Festim Lelaj”.
Çdo ngarkesë e Lanit kishte mbrojtjen e këtyre zyrtarëve të policisë që garantonin kalimin pa asnjë problem jashtë territorit të Shqipërisë. Për këtë, ata kishin pagesën e tyre bazuar në sasitë që transportoheshin.
“Të gjitha operacionet e trafikut gjatë transportit tokësor të drogës në pronësi të tij, ndiqeshin nga agjentë të policisë që u garantohej një komision nga paratë e fituara të trafikut. Në këtë periudhë, falë lidhjeve të shefit të organizatës me policinë, u bë e mundur fikja për 1 orë e radarëve që monitoronin qarkullimin e mjeteve detare”.
Referuar dëshmive, oficeri i policisë Lelaj thirrej nga trafikantët me nofkën “kokëlopa”. Mariglen Shusha ka zbuluar edhe shifrat konkrete të përfituara nga Balla dhe Lelaj. Në një episod, në dëshmi thuhet se janë paguar 15 mijë euro për në tokë dhe 15 mijë të tjera për në det. Pra, shumat respektive për nëndrejtorin dhe oficerin e policisë kufitare. (f.81)
Kur anëtarët e organizatës së trafikut binin në rrjetat e institucioneve ligjzbatuese, ata i kishin marrë masat për të mbyllur dosjet në dyert e drejtësisë. Gjatë operacionit “Shpirti”, u prangos edhe ish prokurori Maksim Sota.
“Nga bashkëpunëtori i drejtësisë Mariglen Shusha janë referuar rrethana të takimeve dhe bisedave të zhvilluara mes shefit të grupit kriminal Ilirian Duçellari dhe prokurorit Maksim Sota për problem të ndryshme me drejtësinë pasi prokurori ishte e angazhuar për ti zgjidhur këto probleme”.
Bashkëpunëtori i drejtësisë ka zbuluar në dëshminë e tij edhe një Prokuror të Krimeve të Rënda, emri i të cilit është hequr nga dosja hetimore shqiptare. Fjala është për Ened Nakuçin, sot, pjesëtar i Prokurorisë së Posaçme Kundër Korrupsionit dhe Krimit të Organizuar. Madje, ai ka arritur të kalojë Vettingun pa u futur në filtër për këtë dosje. Por, çfarë ka ndodhur. Le ti kthehemi edhe njëherë episodit të parë të trafikut, atij të 10 nëntorit të vitit 2015, kur u bllokuan 808 kilogramë kanabis në bregdetin e Vlorës.
Lidhur me këtë tentativë trafiku, ishte shpallur në kërkim shtetasi Robert Myftari, bashkëpunëtor i afërt i shefit të organizatës Ilirian Duçellari. Në këtë material të prokurorisë italiane siguruar ekskluzivisht nga Inside Story, thuhet se Myftari kishte qenë disa herë në lokalin e “Lanit” edhe në prezencë të policëve, por askush nuk e arrestonte. Për zgjidhjen e çështjes, Lani kishte angazhuar prokurorin Maksim Sota.
“Ishte e nevojshme të transferohej procedimi penal nga Tirana në Vlorë. Drejtuesi i hetimeve në Tiranë ishte Ened Nakuçi. Në këtë çështje ndërhynë Maksimi, Miri, Landi dhe psikologu Rezarti. Ata duhej të arrinin tek titullari i dosjes hetimore”
“Ne i kemi, le të themi njoftuar, u kemi vënë në dispozicion hetimet tona. Zbardhja do të jetë detyrë e institucioneve ligjzbatuese shqiptare”, thotë prokurori italian.
Në atë kohë, Ened Nakuçi ishte prokuror i krimeve të rënda që kishte në juridiksion çështjet e trafikut. Çuditërisht, në dosjen shqiptare të operacionit “Shpirti”, nuk gjendet askund emri i prokurorit Nakuçi që përmendet nga i penduari Mariglen Shusha. Ky është dokumenti i përkthyer në gjuhën italiane që i është përcjellë autoriteteve atje për vijimin e hetimeve. Njerëzit e angazhuar nga Lani për mbylljen e dosjes udhëtuan drejt Tiranës referuar dëshmisë që Mariglen Shusha ka dhënë para prokurorëve italianë dhe atyre shqiptarë në 4 Dhjetor 2019.
“Lani ndërhyri edhe përmes personave të tjerë. Unë dhe Lani shkuam në Tiranë ku takuam një avokate rreth të 50-ve. Siç thashë, po kërkonte një kontakt për të arritur tek Enedi, drejtuesi i hetimit. Gruaja, me sa më tha Lani i kishte thënë se do të merrej me çështjen”.
Më pas Duçellari së bashku me Mariglen Shushën dhe një person të quajtur Miri, udhëtojnë drejt Fierit. Atje takojnë një prokuror me origjinë nga Berati që thuhet se ishte vëllai i një deputeti. Prokurori ishte me detyrë në Fier.
“Miri i kishte thënë Lanit që të takonin këtë prokurorin që ai kishte kontakt sepse, ai kishte njohje me Enedin ose një të afërmt të tij me të cilin mund të flisnin për çështjen. Miri tha se do të duhej ti dorëzonin këtij prokurorit nga Berati 10 mijë euro, para që ai më pas do t’ia dorëzonte Enedit ose të afërmit të tij. Në takim prokurori nga Berati nuk i mori paratë dhe i tha Lanit që t’ia jepte Mirit pasi ai e dinte se kujt duhet t’ia jepte”./ Inside Story
