Nje foto e 2016 e Halil Matoshit, qe deputeti kamikaz i Albin Kurtit e ka publikuar tani, per te krijuar idene se Matoshi ka shkelur rregullat antiCovid, ne menyre qe t’i mbyllin atij gojen te mos kritikoje Kurtin
Kosova prej javësh është duke u përballur me një situatë dramatike nga koronavirusi, për shkak të menaxhimit skandaloz të Albin Kurtit.
Çdo ditë, në Kosovë po vdekin me dhjetëra persona, ndërsa Qeveria kosovare duket e dorëzuar.
Por, në vend të reflektonte dhe përveç masave, të kërkonte edhe falje, Albin Kurti ka lëshuar ushtrinë e deputetëve dhe kamikazëve të tij, të hyjnë nëpër profilet e qytetarëve, gazetarëve dhe aktivistëve që kanë qenë kritikë me Kurtin, duke i ofenduar ata apo dhe duke iu publikuar foto private.
Kjo gjë fjala vjen ka ndodhur me gazetarin e njohur Halil Matoshi, të cilit deputeti Eman Rrahmani i ka publikuar një foto të vjetër, për të krijuar idenë se ai ka shkelur masat anti-Covid dhe s’duhet të ketë gojë të kritikojë Albin Kurtin.
Matoshi ka reaguar i revoltuar, duke shkruar si më poshtë:
“Eman Rrahmani, hem rrenc hem i lig!
Deputeti Eman Rrahmani, ka mledhë votat e xhematit, tue shitë nacionalizëm pan-arab në vend të fesë islame, pra tu mashtru dhe tash po don me mashtru përsëdyti, tue përdor nji fotografi timen të vitit 2016, nga festa e 35-vjetorit të maturës 1981, tue dashtë me e paraqitë si fotografi aktuale!?
Historia e fotografisë tu kcy mbi tavolinë:
Fotografi ahengu privat – të cilën e ka postu në grupin “Brezi 81” Flaka Surroi, në maj 2016, pa idenë se munet me u abuzu nga injorantë që kurrë gjâ t’mirë për këtë ven nuk kanë bâ!
E kanë përdor të gjitha partitë politike kosovare, sepse zdralanat e tana partive janë të njajtë, rrenca e agresivë, pra të rrezikshëm për ambientin social (e kanë përdor këtë fotografi madje edhe qarçe pro islamit politik në krejt Ballkanin qëndror) që pesë vjet rresht, tue u munu me shpif diçka rreth meje.
E para, mbështetës të klerofashizmit, duen me i thanë publikut se si H.M. pi raki, sëkëndejmi antifetar, kurse llymi i politikës kosovare dhe fashistat e Facebook-ut duen me dëshmu se H.M. po pi e han me pare t’popullit, kur më 2016 kam qenë vetëm gazetar, në nji medium privat, qysh jam dhe sot.
Dhe kam shku me punu për Qeverinë, në vjeshtë 2017 me rrogë rreth 500 euro, tue lanë rrogën 1200 euro.
Dhe kam dalë nga Qeveria me 3800 euro shpenzime (âsht publike) për dy vjet.
E dyta, deputeti antisemit (që e sheh andërr zhdukjën e Izraelit e ymri nuk ka me ia mbrri!?) Eman rrenci po do me thanë se H.M. po kcen në Pandemi!?
Pra po rren hapun aq i lig që âsht, tue u mundu me e fsheh faktin se kjo shumicë parlamentare as që po lodhet për vdekjën e mesatarisht 25 njerëzve në ditë, tash e dhetë ditë!?
Kjo âsht Kosova e rrencave, jo e idealeve shqiptare të viteve ‘90 -‘99 -2007 (sepse ata hapun kanë qenë kundër të gjitha proceseve shtetkrijuese) kur na ishim unik përball fashizmit serb.
Emani, s’ka ide për mu, se âsht nji i metun me mendësi mesjetare, që e ka pasion me i poshtnu tjerët, por dihet se jo me kcy, por me rrejt âsht marre e vetposhtnim, sepse kush rren edhe vjedh edhe spiunon edhe vret!
Me pi, me knu e ne kcy – në ndeja private e familjare e në kushte kur veni s’ka zi e trishtim – âsht krejt normale!
Privatësi.
Me u veshë me pushtet, përmes rrene e me të dekē njerëzit pa e ndi dorën e shtetit, sepse shteti vetëm po asiston dekën në këtë vend, kjo âsht e trishtueshme.
P.S.
Me këtë fotografi, llymi i kësaj shoqnie âsht ba aq bajat qe pesë vjet dhe sapo të kalojë Pandemia, unë u premtoj se kam me ua dërgu nji fotografi të re, tu kcy mbi tavolinë!
Dhe unë nuk marr leje te pushteti për kângë e valle, sa herë që kam disponim të mirë!?
Plasni zdrala”.
Për sulmin e kamikazëve të Albin Kurtit ka reaguar edhe gazetari tjetër Enver Robelli.
“Deputetët e VV-së që s’kanë guxim të thonë një fjalë kritike për gabimet, dështimet dhe vendimet e pamenduara të qeverisë (sidomos në lidhje me pandeminë) dhe – njëkohësisht – gjejnë kohë të merren me jetën private të qytetarëve, duke shpërndarë në rrjetet sociale fotografi ndejash krejtësisht private, – këta deputetë nuk meritojnë votën e qytetareve dhe qytetarëve.
Merruni pak me viktimat e virusit. Kush s’tregon empati për të vdekurit, ai s’e ka problem t’i atakojë edhe të gjallët. VV si parti dhe deputetët e ndërgjegjshëm të saj duhet të distancohen nga ky mentalitet primitiv i ndonjë deputeti të VV-së”, shkruan Robelli.
