Nga Flogert Muça
Dita e sotme ka qenë një ditë e zakonshme për të gjithë ata që ndjekin zhvillimet e seancave plenare të enjteve.
Partia Demokratike dhe LSI kanë bllokuar foltoren e Kuvendit duke mos lejuar deputetët e mazhorancës të flasin edhe pse zgjidhja e Ruçit për të folur nga vendi duket të paktën ka funksionuar për të votuar projektligjet që ishin në rendin e ditës.
Mirëpo, ironia në gjithë këtë kasaphanë është në faktin se ai bllokim foltoreje nuk është thjeshtë një çështje imazhi apo bllokimi fizik që tregon indinjatën e opozitës pse qeveria nuk po qeveris mirë, por ka tre arsye të tjera të forta që tregojnë se lepuri fle në tjetër vend.
Së pari, duke mos lënë seancën të zhvillohet normalisht tregojnë në sytë e ndërkombëtarëve një klimë politike të paqëndrueshme dhe rrjedhimisht, cënojnë mundësinë e çeljes së negociatave Shqipëri-BE. Kjo lojë e PD-së dhe LSI-së është një mesazh për BE-në, e cila ka vlerësuar punën e bërë nga Shqipëria dhe është shprehur më optimiste së kurrë për çeljen e negociatave. Nga ana tjetër opozita prej muajsh ka ndërmarrë një fushatë denigruese për vendin, vetëm e vetëm që BE të flasë me nota negative për Shqipërinë e për rrjedhojë në Tiranë Basha e Kryemadhi të kenë argument këtë për të sulmuar kundërshtari ne tyre politik. Pasi nuk ja arritën dot atij qëllimi, sulmuan SHBA e BE dhe kanë nisur të stisin skena si kjo e sotmja si për të thënë se këtu nuk ka stabilitet politik.
Arsyeja e dytë e kthimit të Kuvendit si një Pazar i gjësë së gjallë është reforma në drejtësi. Qysh në fillimet e saj palët kanë qenë të ndara si me thikë. Nga njëra anë (pro) ishin rreshtuar SHBA-BE-PS dhe nga ana tjetër (kundër) PD-LSI. Ndërkohë që PD ishte hapur kundër reformës, LSI nën tavolinë bënte çmos për të ndihmuar selinë blu. Akti final ishte mbështetja e çadrës e cila ishte kthyer në pengesën kyçe për ligjin e Vettingut. Sot, me bllokimin e foltores dhe refuzimin e listave të KLGJ e KLP, opozita po vonon krijimin e organeve të reja të drejtësisë që do të çonin përpara shembjen e pallatit të drejtësisë së vjetër.
Arsyeja e tretë e moslejimit të zhvillimit të një séance konform rregullores është ekonomia. Investimi në aeroportin e Vlorës ku mbi 1000 qytetarë kanë mundësinë e punësimit të përhershëm, përpos numrit të lartë të të punësuarve që do të duhen për ndërtimin e këtij projekti 100 milion eurosh është një lajm i keq për opozitën. Investime të tilla si aeroporti i Vlorës, Rruga e Arbrit e të tjera projekte që qeveria është shprehur se pritet të finalizohen janë një lajm i keq për opozitën.
Në kushtet e mospasjes së një programi dhe të një fryme anti-qeveritare në popull, opozita ka humbur davanë dhe është kthyer në një grusht kaçakësh që nuk lejojnë një institucion të funskionojë, pasi ju prish punët e tyre.
