Halit Shamata është Ministri i një prej periudhave më të vështira që ka kaluar Shqipëria pas përmbysjes së komunizmit. Dinamikat e viteve 1996-1997 krijuan një perceptim të ndarë, mbi figurën e ministrit.
Shamata është njeriu që drejtonte dikasterin në kohën e shtypjes së revoltave popullore të nisura në janar të vitit 1997.
”Po është akuzuar për ngjarjet e ’97-ës por nuk ka lidhje Halit Shamata. Në kohën kur u ashpërsuan ngjarjet, parlamenti vendosi që shefi operacionit ishte gjeneral Gazidede”, tha gazetari Artan Hoxha.
Kriza e firmave piramidale nxori popullin në rrugë. Në Tiranë, Fier, Lushnje, Vlorë, Berat, Tepelenë e më gjerë qytetarët u derdhën me mllef duke u vënë zjarrin institucioneve. Marsi i atij viti ishte momenti i vlimit dhe shkërmoqjes totale të shtetit. Forcat e rendit u përpoqën të shtypnin protestat. Ajo kujtohet si policia më e dhunshme.
Pavarësisht kush ishte urdhëruesi i vërtetë i dhunës, tek populli opozitar i kohës ai shikohej me syrin e ministrit të policisë së represionit.
“Halit Shamata, komandanti gardës, shefi shtabit ushtrisë, kanë qenë disa në atë periudhë, sidmos në ’97-ën u përfshinë në operacione kundër popullsisë”, tha Erion Braçe.
“Ajo që mbaj mend, operacione duke goditur disa grupe në Jug. Pati akuza se u goditën vetëm kundërshtarë politik dhe nuk u goditën personazhet e botës krimit”, tha Artan Hoxha, gazetar.
Shamata u largua nga detyra më 3 Mars, ditë në të cilën Sali Berisha u rizgjodh president nga Parlamenti i dalë nga zgjedhjet e manipuluara të 26 Majit të vitit 1996.
Lidhur me veprimet policore gjatë trazirave, Halit Shamata është arrestuar në 22 Gusht të vitit 1998. Ai u akuzua për “Krime Kundër Njerëzimit” së bashku me 5 zyrtarë të tjerë të Partisë Demokratike në atë që quhej procesi i të 6-ve. Shamata u mbajt vetëm disa javë në paraburgim. Në Korrik të vitit 2001 prokuroria pushoi cështjen për mungesë provash. Më pas ai fitoi pafajësinë në Gjykatë.
“Shamata dhe disa personazhe të tjerë janë arrestuar në ’98-ën por u liruan pa shkuar në gjyq, pas një marrëveshje politike në atë kohë”, tha gazetari Ferdinand Dervishi.
“Ajo priudhë identifikohet me emrin e Sali Berishës që ishte në krye të shtetit. Emrat e tjerë janë instrumenta që përdoren, njerëz që pranohen të bëhen instrumenta”, tha ish-ministri Luan Rama.
Kundërshtarët politikë, i kanë vënë një njollë në CV politike duke i faturuar përgjegjësi për grabitjen e thesarit të shtetit në Krrabë. Në fakt, skandali shpërtheu në vitin 2000, kur në pushtet ishin socialistët. Por, mendohet se grabitja e 280 kilogramëve flori ka ndodhur gjatë trazirave të Marsit 1997.
Në thelb të akuzave të pafaktuara ndaj Shamatës qëndron fakti se ai ka urdhëruar pas 27 Shkurtit të vitit 1997 pezullimin e kontrolleve 3-mujore në tunelin ku ruhej ari.Top story
