Lëvizja Socialiste për Integrim vijon të rrijë çdo ditë me frikën e një marrëveshje të dytë mes kryeministrit Edi Rama dhe kreut të opozitës Lulzim Basha. Më 17 maj 2017 dy liderët kryesorë politikë në vend arritën paktin për një qeveri teknike, pakt i cili goditi më së shumti LSI. Partia e drejtuar nga Ilir Meta pretendonte mbi 40 deputetë në atë kohë, por mori vetëm 19. Mirëpo dalja në skenë e lajmeve se në shtator do ketë ndryshime në qeveri duket se ka filluar të shqetësojë kampin Meta-Berisha-Kryemadhi.
Kryeministri Rama ka mbledhur në Vlorë qeverinë dhe secili ministër ka dhënë sqarime për dikasterin që mbulon. Në shtator pritet të mblidhet Asambleja e PS dhe flitet se do ketë lëvizje ministrash. Por kjo gjë ka shqetësuar LSI, pasi Meta e Kryemadhi dyshojnë se mund të bëhet fjalë për ndryshime në qeveri që përfshijnë dhe Partinë Demokratike. Rama ka deklaruar se në shtator do të dalë me një paketë propozimesh për PD dhe pritet të ketë një takim të dytë mes tyre, si ai i 17 majit. Por ajo që shqetëson LSI dhe Berishën me Metën është se ky takim mund të ndodhë përpara Asamblesë së PS dhe të bihet dakord për bashkëqeverisje. Burime të sigurta të gazetës në PS dhe pranë kryeministrit
Rama thanë se deri më sot nuk është përcaktuar asnjë datë për mbledhjen e Asamblesë. Edhe pse flitet se do jetë 8 shtatori, nuk ka asgjë zyrtare. Po ashtu, një burim pranë shefit të qeverisë tha se nuk është çudi që ndryshimet në qeveri të shtyhen për një moment të dytë, qoftë dhe pas ftesës që PS do i bëjë PD. LSI përmes mediave pranë saj dhe analistëve të caktuar, prej ditësh ka filluar të hedhë sulme dhe të paralajmërojë një pakt të dytë Rama-Basha para se të vendoset për ndryshimet në qeveri.
Meraku i tyre është se Rama mund të bjerë dakord me Bashën për të ndarë qeverinë në kuadër të Bashkimit Europian dhe të nxjerrin jashtë loje LSI. Përmes medieve pranë tij, Meta prej ditësh ka hedhur idenë e qeverisë teknike, por kërkon që pjesë e saj të jetë dhe LSI. Po ashtu kërkohet që dhe në bisedimet që priten në vjeshtë të ketë një takim PS-PD-LSI dhe jo vetëm takim Rama-Basha.
Qeveria teknike
Gazeta e deklaroi që pak ditë më parë se Berisha dhe Meta janë duke përgatitur një skenar që të shkohet në qeveri teknike. Por mësohet se plani i tyre është që të largohet Rama si kryeministër dhe pastaj pushteti të ndahet mes PS, PD dhe LSI. Edhe thirrjet e ditëve të fundit të Berishës dhe deputetëve të LSI për revolat, bëhen në kuadër të këtij plani. Por frika e Berishës, Metës dhe Kryemadhit është se mos Rama i propozon Bashës një qeveri PS-PD dhe ai të jetë ende kryeministër. Për këtë arsye LSI përmes medieve pranë saj ka nisur presionet dhe sulmet.
Por gazeta ka mësuar se ideja e qeverisë teknike nuk ekziston fare në platformën e PS dhe të kryeministrit Edi Rama. Vetë shefi i qeverisë pak ditë më parë e deklaroi se në zgjedhjet vendore do shkohet në koalicion vetëm me qytetarët. Por ajo që ka mësuar gazeta është se në fillim të shtatorit Rama pritet të kërkojë një takim të dytë me Lulzim Bashën. PS do kërkojë bashkëpunim për disa çështje, kryesisht për reformën në drejtësi.
Por nga ana tjetër Rama do të bëjë dhe një sërë lëshimesh, të cilat do i shohim në ditët në vijim. Pritet që PS e PD ta gjejnë dakordësinë për ligjin e magjistratëve dhe amendimin e neneve që rrëzoi Kushtetuesja. Po ashtu pritet të ketë konsensus dhe sa i takon reformës zgjedhore. Në vjeshtë do të mbërrijnë në Tiranë dhe disa prej eurodeputetëve, të cilët do nisin konsensusin në kuadër të integrimit. Të gjithë këto duket se shqetësojnë më shumë LSI, pasi nëse kemi një takim të dytë Rama-Basha, partia e Presidenti është më e rrezikuara. /sot
