Një incident i rëndë, për shkak të mosrespektimit të kushteve të punës, ka ndodhur disa ditë më parë në mjediset e kompanisë problematike Kurum, e cila është përpjekur të fshehë ngjarjen, për shkak të mundësisë së pasojave ligjore. Prapaskena mëson se ka shpërthyer një bombol oksigjeni pranë furrave të shkrirjes së çelikut, ku për rrjedhojë ka mbetur i plagosur rëndë një punonjës.
Sipas burimeve, punonjësi është dërguar me urgjencë në një spital privat, ndërsa përfaqësuesit e kompanisë kanë marrë masa që ngjarja të mbetej e fshehtë. Gjendja shëndetësore e punonjësit mbetet e rëndë, ku rrezikon të humbasë shikimin.
Ky është vetëm shpërthimi dhe skandali i radhës i kompanisë Kurum, punonjësit të të cilës punojnë në kushte të pasigurta dhe shpeshherë në shkele të rregullave dhe kritereve.
Në shkurt të vitit 2021, një bombol gazi ka shpërthyer tek furrat e Kurum. Edhe në këtë rast, dyshohet se kompania ka fshehur pasojat e shpërthimit tek punonjësit.
Në korrik të vitit 2020, në zonën e ish-kombinatit metalurgjik në Elbasan, që administrohet nga kompania turke Kurum, në repartin e oksigjenit, u shënua një shpërthim i fuqishëm, ku për pasojë u plagosën disa punonjës, 3 prej në gjendje të rëndë (Qemal Mullahu, 61-vjeç, Eduard dhe Osman Bendaj, 42 dhe 69 vjeç, babë e bir).
Më parë, një tjetër shpërthim i fuqishëm ka ndodhur në furrën e shkrirjes së Uzinës së Çelikut te ish-Metalurgjiku, ku u dogj punonjësi Hyqmet Doka. Nga shpërthimi i llavës, thuajse në 90 për qind e trupit të punonjësit u dogj.
Në një rast tjetër, nga një incident i rëndë, një punonjës ka humbur gishtat. Dyshime të forta ka se shumë incidente të tjera kanë ndodhur, por nuk janë marrë vesh kurrë.
Skandali financiar
Dy vjet më parë një skandal i madh financiar përfshiu kompaninë më të madhe të prodhimit të hekurit në Shqipëri, “Kurum International SHA’, pjesë e ‘Kurum Demir’, kompanisë më të madhe të hekurit në Turqi. Sipas një investigimi të medieve turke, ‘Kurum’ në Shqipëri ka mashtruar me bilance të rreme 5 banka të nivelit të dytë në vendin tonë, duke u marrë 210.3 milionë euro kredi, në një kohë kur kishte nisur procedurat e falimentimit.
Mashtrimi në Shqipëri është pjesë e një mashtrimi të madh ndërkombëtar, me bazë në Turqi. Sipas ‘SABAH’, ‘Kurum Demir’ dhe degët e saj u kanë marrë kredi me bilance të falsifikuara 33 bankave në Shqipëri, Turqi dhe Angli.
Përfaqësuesit e kompanisë u përballen me drejtësisë turke, pasi akuzohen nga autoritetet turke për vepra të rënda penale si mashtrimi dhe pastrimi i parave. Drejtuesit e Kurum janë kallëzuar nga 14 banka turke, të cilat kanë rënë pre e skemës së mashtrimit. Ndërkaq, në Shqipëri skandali kaloi në heshtje.
