Ilir Meta ka nisur një sulm të paprecedentë ndaj Shteteve të Bashkuara të Amerikës dhe Bashkimit Evropian, për shkak të angazhimit të tyre në hartimin, miratimin dhe zbatimin e reformës në drejtësi. Duke përdhosur funksionin e kreut të shtetit, në shënjestër të sulmeve të Metës është EURALIUS, misioni i Brukselit që asiston autoritetet shqiptare për zbatimin e reformës në drejtësi.
Po pse Ilir Meta po i turret këto ditë EURALIUS?
Arsyeja është e thjeshtë. EURALIUS propozoi disa ndryshime në ligjin anti-mafia, të cilat prekin Ilir Metën dhe Monika Kryemadhin. EURALIUS propozoi që në ligjin anti-mafia të zgjerohej rrethi i të afërmeve të politikanëve, të cilët do të hetohen dhe do t’u konfiskohen pasuritë e paligjshme.
Sipas propozimit të EURALIUS do të konfiskohen transferimet dhe regjistrimet e pasurive të politikanëve dhe të gjithë zyrtarëve, në emër të bashkëshortit, fëmijës, të paralindurit, të paslindurit, vëllezërve, motrave, xhaxhallarëve/dajave, hallave/tezeve, nipërve/mbesave, fëmijëve të vëllezërve dhe motrave, vjehrrit, vjehrrës, dhëndrit, nuses, kunatës, kunatit, bashkëjetuesit, thjeshtërit, thjeshtrës, njerkut dhe njerkës.
Ky ndryshim u pranua nga Parlamenti dhe u përfshi në ligjin anti-mafia. Ligji anti-mafia do të jetë një nga mekanizmat kryesorë të SPAK-ut për goditjen e pasurive të paligjshme të politikanëve, në emër të tyre ose të fshehur në emër të të afërmeve. Por, ky propozim ka tërbuar Ilir Metën, i cili ka një pasuri të deklaruar gati me vlerë 10 milionë euro, të pajustifikuar me burime të ligjshme.
Sipas propozimit të EURALIUS personat kanë barrën për të justifikuar që të gjitha veprimtaritë dhe pasuritë e sekuestruara, të poseduara, pjesërisht ose plotësisht, në mënyrë të drejtpërdrejtë ose jo, janë fituar në mënyrë të ligjshme. Ky ligj nuk zbatohet aktualisht për Ilir Metën për arsye të paqarta. Por me ngritjen e SPAK-ut, Meta dhe Kryemadhi duhet të japin llogari se si i kanë bërë pasuritë. EURALIUS propozoi edhe shtimin e veprave penale në fushën e zbatimit të ligjit Anti-mafia. Në fushën zbatimi të Anti-mafias është përfshirë edhe ushtrimi i ndikimit të paligjshëm ndaj personave që ushtrojnë funksione publike./Pamfleti
