Këngëtarja e njohur Elsa Lila mban në Tiranë recitalin e saj të parë, “Finalmente Elsa” më 1 nëntor. Mbrëmja është e konceptuar me këngë dhe rrëfime ndërsa artistja zbuloi detaje para medias.
“Muzika është mënyra ime e shprehjes dhe është një mënyrë për të falënderuar publikun që më ka ndjekur prej 27 vitesh, jemi rritur bashkë.
Unë kam zërin mënyrë shprehëse dhe recitali është një eskursus i 27 viteve të repertorit të muzikës së lehtë që më ka shoqëruar nga kënga “Pyes lotin”, te “Valeria” dhe pjesët e San Remos si edhe pjesë tradicionale shqiptare që unë kam kënduar”, Elsa Lila.
Në koncertin me muzikë, fjalë dhe tinguj, Elsa Lila do të shoqërohet nga bendi dhe maestro Enrico Melozzi, që veçoi tiparet dhe ngjyresat unike të zërit të këngëtares. Vetë ajo, foli për marrëdhënien e gjatë me muzikës dhe fjalët e së bijës para koncertit.
“Unë e ndjeja muzikën që pa lindur, që në barkun e nënës sime. Kur isha 2 a 3 vjeçe kisha një radio, radio “Mimoza” që e përqafoja fort dhe i dija emisionet përmendësh. Evita do jetë në publik. I propozuam të ngjitej në skenë me flautin e saj. Është pak e turpshme se është e vogël. Dhe duke qenë se Pallati i Kongreseve i duket shumë i madh, më tha, mama për këtë radhë nuk mundem”, tregoi ajo.
Elsa Lila la gjurmë të thella në muzikën shqiptare që më ngjitjen e saj të parë në skenën në moshën 15-vjeçare kur rrëmbeu çmimin e parë. Prej atëherë, ka fituar disa çmime duke ruajtur gjithnjë stilin e saj artistik dhe unicitetin që e karakterizon në materialet qe zgjedh.
